Jetisý oblysynda qant qyzylshasyna qosymsha sýbsıdııa bólinedi
Keler jyldan bastap qant qyzylshasynyń ár tonnasyna memleketten taǵy 10 myń teńge qosylyp, 40 myń teńgege jetetin bolady. Bul týraly jetisýlyq sharýalarmen kezdesken aýylsharýashylyǵy vıtse-mınıstri Ábilqaıyr Tamabek málimdedi. Al bıyl sharýalar ónim tonnasyn 30 myń teńgeden ótkizedi. Onda da 15 myń teńgesin qant zaýyty tólese, 15 myń teńgesi jergilikti bıýdjetten. Bul baǵa qyzylsha ósirýshilerdiń kóńilinen shyqpaı otyr. Sebebi tuqymnan bastap janarmaı, tyńaıtqysh, aýylsharýashylyǵy tehnıkasynyń baǵasy birneshe ese ósken. Sondaı-aq bıyl qant qyzylshasyn bir ǵana zaýyt qabyldamaq. Óıtkeni oblys sharýalary ósirgen kólem bir kásiporynnyń qýatyna áreń jetip otyr. Bul da artyq shyǵyn deıdi, sharýalar.
Jalpy Jetisý oblysynda bıyl 6 myń gektarǵa tátti túbir egildi. 180-nen astam sharýashylyq ónim jınaý naýqanyna daıyndyq ústinde. Aqsý qant zaýyty jyl boıy jumys isteý úshin modernızatsııaǵa jabylyp otyr. Vedomstva ókilderi sharýalardyń birqatar máselesin jergilikti bılikpen birlesip sheshýge kelisti. Basty másele sýarmaly alqaptardy kóbeıtip, ıgerilmeı jatqan jerlerdi iske qosý. Al Úkimet keler jyldan bastap sýbsıdııalaýdyń jańa erejesin usynyp otyr. Qant qyzylshasyn ósirýshilerge de jeńildik joq emes.
«Endi bir másele tehnıkaǵa baılanysty baǵa jańadan belgilenedi. Sonyń 25-30 paıyzy otandyq tehnıka bolsa, al sheteldik ımport bolatyn bolsa 15 paıyzy sýbsıdııalanady. Biraq ta qant qyzylshasyn jınaıtyn kombaınǵa 50 paıyz qoıyp otyrmyz», - dedi aýylsharýashylyǵy vıtse-mınıstri Ábilqaıyr Tamabek.