Jetisý oblysynda qant qyzylshasy alqaptary 2 ese ulǵaıady

TALDYQORǴAN. QazAqparat - Jetisý oblysynda kóktemgi dala jumystary qyzý júrip jatyr. Bıyl qant qyzylshasynyń egistik kólemin 2 ese ulǵaıtyp, 8 myń gektarǵa jetkizý josparlanǵan, dep habarlaıdy QazAqparat.

Qyzylsha egý jumysyna kirisken sharýashylyqtyń biri - Eskeldi aýdanyndaǵy «Dúısenbinov» sharýa qojalyǵy.

Qjalyqtyń egis alqabyna oblys ákimi Beıbit Isabaev baryp, dala jumystarynyń barysymen tanysyp qaıtty.

«Dúısembinov» sharýa qojalyǵynyń qant qyzylshasyn ósirip kele jatqanyna birneshe jyl bolǵan. Máselen, fermer ótken jyly ónimdilikti rekordtyq kórsetkishke jetkizip, qant zaýytyna 22 myń tonnadaı tátti túbir ótkizgen.

Bıyl Aıdyn Dúısenbinov qant qyzylshasynyń alqabyn 320 gektarǵa jetkizbekshi.

Degenmen fermer alqaptyń kóleminen buryn onyń shyǵymdylyǵy men sapasy mańyzdy ekenin jasyrmaıdy. Sondyqtan topyraq tyńaıtqyshyna erekshe mán beredi.

- Nemister óndirgen tuqymnyń jańa túrlerin bıylǵy jyly alǵash ret qoldana bastadyq. Aýa raıy qolaıly bolsa, 10 kúnde ónip shyǵady. Bul tuqymdardyń shyǵymy jaqsy. Biraq jaqsy ónimge qol jetkizý úshin tehnıkamen ǵana emes, jermen de jumys isteý kerek. Taldaý jasap, qandaı tyńaıtqyshtar kerek ekenin anyqtap, soǵan qaraı áreket etemiz. Egis jumystaryn 3 sáýirde bastadyq, qazirge deıin 150 gektar jerdi seýip boldyq. Zamanaýı tehnıkany paıdalanyp otyrmyz, solardyń arasynda pnevmatıkalyq sepkishimiz de bar. Onda barlyq protsess avtomattandyrylǵan. Tuqym tereńdigi - 2,5 sm, aralyq qashyqtyǵy - 15 sm bolatyn retpen sebiledi, - deıdi A.Dúısenbinov.

Egistik alqabyndaǵy jumys barysymen tanysqan oblys ákimi bıyl óńirde qyzylsha sebý eki esege jýyq artatynyn aıtty:

- Ótken jyly qyzylsha alqaby 4,2 myń ga bolsa, bıyl onyń kólemi 8,1 myń ga jetedi. Soǵan sáıkes ónim kólemi de eki ese ósedi. Búgin «Dúısembinov» sharýa qojalyǵynda bolyp, egistik jumystarynyń barysyn kórdim. Bul - oblysta qyzylsha ósirýmen uzaq ýaqyttan beri aınalysyp kele jatqan tájirıbeli sharýashylyqtyń biri. Qazir munda barlyq agrotehnologııany saqtaı otyryp, qant qyzylshasy sebilip jatyr. Oblysta Aqsý jáne Kóksý qant zaýyttary bar ekenin bilesizder. Shamamen 40-45 myń tonna qant alamyz dep josparlap otyrmyz. Buǵan qosa eki zaýytta da qant quraǵy óńdeledi, - dedi B. Isabaev jýrnalıstermen tildeskende.

Jalpy Eskeldi aýdanynda qant qyzylshasyn ósirýmen 70-teı sharýa aınalysady.

Ótken jyly egis alqaby bir jarym myń gektardan asyp, 100 myń tonnadaı ónim alynǵan bolatyn.

Al bıyl aýdandaǵy qyzylsha alqaby eki myń gektarǵa jetkiziledi. Al jalpy Jetisý oblysy boıynsha qant qyzylshasy 8,1 myń gektardy quramaq.

Foto: Jetisý oblysy ákimdigi