Jetisý oblysynda eki jaıaý júrginshini kólik qaǵyp, mert qyldy

TALDYQORǴAN. QazAqparat – Jetisý oblysynda eki jaıaý júrginshini kólik qaǵyp, mert qyldy, dep habarlaıdy QazAqparat tilshisi.

Jol-kólik oqıǵasy «Almaty-Óskemen» tas jolynyń 141 shaqyrymynda boldy. 29 jastaǵy Aýdı kóliginiń júrgizýshisi rýldi basqara almaı, jaıaý júrginshiler ótkelinen ótip bara jatqan eki jaıaý júrginshini qaǵyp ketti. Eki er adam sol jerde kóz jumdy.

«Atalǵan fakti boıynsha sotqa deıingi tergep-tergeý bastaldy. Onyń barysynda qajetti saraptamalar taǵaıyndala otyryp, ólimge ákelgen JKO-nyń barlyq mán-jaıy anyqtalady. Avtokólik arnaıy avtoturaqqa ornalastyryldy», - delingen Jetisý oblystyq polıtsııa departamenti baspasóz qyzmetiniń habarlamasynda.

Polıtsııa kólik júrgizýshilerinen jyldamdyq rejımin qatań saqtaýdy suraıdy. Esińizde bolsyn, jol qozǵalysy erejelerin elemeý, ádette, qaıǵyly jaǵdaıǵa ákeledi.