Jetisý oblysynda egin orý jumystary bastaldy

TALDYQORǴAN. QazAqparat – Jetisý oblysyndaǵy Aqsý, Alakól, Eskeldi, Qaratal, Kerbulaq, Kóksý, Sarqan aýdandary men Taldyqorǵan qalasynda egin orý jumystary júrip jatyr, dep habarlaıdy QazAqparat oblys ákimdiginiń baspasóz qyzmetine silteme jasap.

Oblystyq Aýyl sharýashylyǵy basqarmasynyń málimetine qaraǵanda, búginde 46,3 myń gektar masaqty-dándi daqyldar orylyp, 85,7 myń tonna astyq bastyrylǵan. Ortasha ónimdilik gektaryna 18,5 tsentnerden aınalyp otyr.

«Egin jınaý jumystaryna oblysqa 7 924 tonna dızel otyny bólindi. Qazir operator anyqtaldy, jergilikti operator resýrs ustaýshy kompanııamen kelisimshartqa otyrdy. Operatordyń rezervinde qazir 500 tonna dızel otyny bar. Suıyq otyn berýge sharýashylyqtarmen kelisimsharttar jasalyp jatyr», - delingen basqarma habarlamasynda.

Jalpy, oblysta dándi daqyldar 325,2 myń gektarǵa sebilgen, sonyń 267,2 myń gektary – masaqty-dándi daqyldar.