Jetisý oblysynda bir mezette 500 bala kúı tartty

TALDYQORǴAN. QazAqparat – Jetisý oblysynyń Qarabulaq aýylynda dombyra kúnine oraı 500 bala kúı tartyp, jerlesterin tánti etti, dep habarlaıdy QazAqparat tilshisi.

Eskeldi aýdanyndaǵy eldi mekenderden jınalǵan oqýshylar ortalyq alańda qazaqtyń kıeli aspabymen kúıdi kúmbirletti. Jalpy, aýdanda myńnan astam bala dombyra úıirmelerine qatysady. Merekelik sharada kásibı kúıshiler dombyranyń shyǵý tarıhyn, aspap týraly túrli ańyzdardy áńgimeledi.

«Ózim qazirgi ýaqytta segiz kúı bilemin. Buıyrtsa jaqynda «Adaı» kúıin úırenemin. Dombyrany shertkende ózimdi erkin sezinemin. Mysaly, kóńil kúıim joq kezde dombyra shertsem, ózimdi sondaı jaqsy sezinip qalamyn», - deıdi Alına Qanat.

Aýyl turǵyndarynyń kóńilin eleń etkizgen shara barysynda ulttyq taǵam men ulttyq buıymdar kórmesi de uıymdastyryldy. Sondaı-aq, balalar asyq oınap, aǵa býyn aýdan ónerpazdarynyń kontserttik baǵdarlamasyn tamashalady. Zııaly qaýym ókilderi aqyn Baqtybaı Jolbarysulynyń eskertkishine gúl shoqtaryn qoıyp, rýhyna taǵzym etti.