Jetisý oblysynda balabaqsha býhgalteri 40 mıllıonǵa jýyq bıýdjet qarajatyn jymqyrǵan

JETІSÝ. QazAqparat – Jetisý oblysynyń Aqsý aýdanynda balabaqsha býhgalteri ózine joǵary jalaqyny zańsyz tóleý arqyly 40 mln teńgege jýyq bıýdjet qarajatyn urlady degen kúdikke ilindi, dep habarlady QazAqparat.

Bas prokýratýranyń málimetinshe, jymqyrý faktisi shtat kestesi men banktik shottardy salystyrý kezinde anyqtalǵan. Onda tıisti jalaqy men naqty tólengen qarajat arasynda aıyrmashylyq boldy.

Osy fakti boıynsha prokýratýra Qylmystyq kodekstiń 189-baby 4-bóligi 2-tarmaǵy boıynsha sotqa deıingi tergep-tekserýdi bastady (asa iri mólsherde urlaý). Іsti Jetisý oblysy prokýratýrasynyń sotqa deıingi tergep-tekserý basqarmasy tekserip jatyr. Osy baptyń sanktsııasy belgili bir laýazymdardy atqarýǵa nemese belgili bir qyzmetpen aınalysýǵa tyıym sala otyryp, 12 jylǵa deıin bas bostandyǵynan aıyrýdy qarastyrady.