Jetisý oblysynda avtobýs aýdarylyp, bir adam mert boldy

TALDYQORǴAN. QazAqparat – Jetisý oblysynda Zaısan-Almaty baǵytynda kele jatqan jolaýshylar avtobýsy aýdarylyp, bir adam mert boldy. Taǵy úsh adam túrli dene jaraqatymen aýrýhanaǵa tústi, dep habarlaıdy QazAqparat tilshisi.

Oblystyq polıtsııa departamenti baspasóz qyzmetiniń málimetinshe, kólik apaty Almaty-Óskemen tas jolynyń 396-shaqyrymynda bolǵan.

«Maýsymnyń 11-inen 12-sine qaraǵan túni Aqsý aýdany Taras aýylynyń mańynda jolaýshylar avtobýsy aýdaryldy. Aldyn ala boljam boıynsha, «Setra» avtobýsynyń 50 jastaǵy júrgizýshisi rólge ıe bola almaı qalǵan. Kólik Zaısan qalasynan Almatyǵa qaraı kele jatqan. Oqıǵa ornynda 66 jastaǵy áıel mert boldy, taǵy úsh adam zardap shegip, aýrýhanaǵa tústi. Jaraqat alǵandardyń ishinde 7 jastaǵy qyz bala bar», - delingen departamenttiń baspasóz qyzmeti taratqan habarlamada.

Vedomstvonyń aqparatyna sáıkes, qazir atalǵan jol-kólik oqıǵasy boıynsha QR QK 345-baby 3-tarmaǵyna sáıkes tergeý júrip jatyr. Saraptamalar taǵaıyndalǵan.