Jetisý oblysynda adam óltirgen qylmysker 16 jylǵa sottaldy

TALDYQORǴAN.QazAqparat - Jetisý oblysynda adam óltirgen qylmysker16 jylǵa sottaldy, - dep habarlaıdy QazAqparat tilshisi.

Jetisý oblysynyń qylmystyq ister jónindegi mamandandyrylǵan aýdanaralyq sotymen atys qarýyn, oq-dárilerdi zańsyz saqtaý (QK-niń 287-babynyń 3-bóligi) jáne basqa adamdardyń ómirine qaýipti tásilmen jasalǵan adam óltirý (QK-niń 99-babynyń 2-bóliginiń 6) tarmaǵy) faktileri boıynsha sottalýshy A.-ǵa qatysty qylmystyq isi qaraldy.

Ótken jyldyń mamyr aıynda sottalýshy A. Jetisý oblysy Aqsý aýdanyna qarasty Qyzylaǵash aýylynda janjal kezinde jábirlenýshi M.-niń moınyna qaraı eki márte oq atqan. Alǵan dene jaraqatynan M. oqıǵa ornynda qaza bolǵan. Budan bólek, jábirlenýshiniń jas balasynyń qolyna da bytyra tıgen.
Prokýror sottan sottalýshyny taǵylǵan aıyppen kináli dep tanyp, A.-ǵa 17 jyl 6 aı merzimge bas bostandyǵynan aıyrý jazasyn taǵaıyndaýdy suraǵan.
Advokat jáne sottalýshy A. sońǵynyń áreketin QK-iń 99-babynyń 1-bóligine saı qaıta saralap, osy bappen kózdelgen tómengi jaza taǵaıyndaýdy surady.
Sot sheshimimen jaza taǵaıyndaǵanda sot qylmystyq jaýapkershilikti jeńildetetin mán-jaılar retinde sottalýyshynyń kámiletke tolmaǵan balalarynyń bolýyn eskerdi.
«Qylmystyq jaýapkershilikti aýyrlatatyn mán-jaılar anyqtalmady. Qylmystyq is oqıǵasyna sáıkes, qylmystyq áreket QK-niń 287-babynyń 3-bóligimen jáne 99-babynyń 2-bóliginiń 6) tarmaǵymen saralandy. Sot úkimimen A.-ǵa túpkilikti 16 jyl bas bostandyǵynan aıyrý jazasy taǵaıyndaldy»,- delingen Jetisý oblysy sotynyń baspasóz qyzmetiniń habarlamasynda.
Úkim zańdy kúshine engen joq.