Jetisý oblysynda adam ólimine qatysy bar kúdikti bir aı degende ustaldy

TALDYQORǴAN. QazAqparat – Jetisý oblysynda aýyldasyn óltirdi degen kúdikpen izdeýde bolǵan er adam ustaldy, dep habarlaıdy QazAqparat tilshisi.

Eskeldi aýdanynyń polıtseıleri aýyldasynyń ólimine qatysy bar degen kúdikpen buryn birneshe ret sottalǵan, izdeýde júrgen 43 jastaǵy kúdiktini ustady. Ol aýdandyq polıtsııa bólimine jetkizilip, ýaqytsha ustaý ızolıatoryna qamaldy.

«16 qyrkúıek kúni Aldabergenov aýylynda eki jergilikti turǵyn janjaldasyp qalady. Basynan aýyr jaraqat alǵan er adamnyń biri aýrýhanaǵa jetkizilip, dárigerlerdiń tyrysqanyna qaramastan, sol jerde qaıtys boldy. Kúdikti jasyrynyp, kóp uzamaı memleketaralyq izdeýge jarııalandy. Belgili bolǵandaı, er adam buryn aýyr qylmys jasaǵany úshin birneshe ret jaýapkershilikke tartylyp, jazasyn túzeý mekemelerinde ótegeni anyqtaldy», - dep málimdedi Jetisý oblystyq polıtsııa departamenti baspasóz qyzmetinen.

Jedel izdestirý is-sharalary barysynda er adamnyń Taldyqorǵan qalasyndaǵy jaldamaly páterlerdiń birinde jasyrynǵany anyqtaldy. Arnaıy jasaq jaýyngerleriniń kómegimen kúdikti ustalyp, aýdandyq polıtsııa bólimine jetkizilip, qamaldy.

Іs QR QK 106-babynyń 3-bóligine (jábirlenýshiniń ólimine ákep soqqan densaýlyqqa qasaqana aýyr zııan keltirý) sáıkes júrgizilip jatyr.