Jetisý oblysynda 647 adam jiti ishek juqpasymen aýyrǵan

TALDYQORǴAN. QazAqparat – Jetisý oblysynda jyl basynan beri jiti ishek juqpasyna qatysty 647 jaǵdaı tirkeldi. Onyń 438-i – 14 jasqa deıingi balalar, dep habarlaıdy QazAqparat tilshisi.

Bul ótken jylmen salystyrǵanda 84 paıyzǵa joǵary. «Juqpanyń taralý joldarynyń anyqtalý kórsetkishi 81 paıyz. Onyń ishinde 94,5%-y taǵam arqyly taraǵan. Oǵan úı jaǵdaıynda daıyndalǵan, tońazytqyshsyz saqtalǵan taǵam jáne jýylmaǵan jemis-jıdekter basty faktor bolyp otyr. Syrqattanýshylyq boıynsha 2 jasqa deıingi balalar «qaýipti topqa» jatqyzylady», - dedi Jetisý oblysynyń sanıtarııalyq-epıdemıologııalyq departamenti basshysynyń orynbasary Samat Ahmetov.

Spıkerdiń aıtýynsha, aýrýdyń berilý faktorlary – taǵam, sý, turmystyq zat jáne oıynshyqtar. Keıbir juqpalardyń taralýyna jándikterdiń de áseri bolatyn kórinedi. Jiti ishek ınfektsııasyn juqtyrýǵa antısanıtarlyq jaǵdaı, jeke bas gıgıenasyn saqtamaý, sanıtarlyq erejeler saqtalmaı daıyndalǵan taǵamdardy paıdalaný sebep bolady.

«Qazirgi ýaqytta oblystyq Juqpaly aýrýlar aýrýhanasynda 20 naýqas jiti ishek ınfektsııasy dıagnozymen emdelip jatyr. Onyń 80%-y bala. Jáne bireýi jansaqtaý bóliminde jatyr. Jazdyń basynan beri JІI dıagnozymen 700 naýqas emdeldi. Ótken jylmen salystyrsaq, osy kezeńde 460 bolǵan», - dedi oblystyq ınfektsııalyq aýrýhanasynyń ınfektsıonıst dárigeri Gýzel Taımırova.

Infektsııanyń negizi kózi – aýrý adam nemese JІI qozdyrǵyshtarynyń tasymaldaýshysy. Sondyqtan jeke bas gıgıenasy, taǵam jáne jemis-jıdekterdi qoldanǵanda árbir adamn abaı bolýyn kerek. Mamandar ishektiń buzylýynyń alǵashqy belgileri paıda bolǵan kezde dárigermen keńesý kerek ekenin eskertedi.