Jetisý oblysynda 5 jyl buryn salynǵan sý munarasy áli iske qosylmaǵan
Sonyń saldarynan halyq áli eski sý júıesinen sý alyp otyr. Ol jerde sýdyń qysymy az.
«Biz túsinbeımiz, eski qubyrdyń sýyn tutynatyn bolsaq, ne sebepti sý munarasy 134 mıllıon teńgege salyndy. Memlekettiń qyrýar qarjysy jumsaldy. Barlyǵy qaǵaz júzinde ǵana istep tur, shyn mánisinde mine jańadan salynǵan sý munarasy qańyrap tur. Esik-terezesi synǵan. Sol sebepti sybaılas jemqorlyqpen kúres qyzmetkerleri kelip, ár tıynǵa jasalǵan jumystyń nátıjesin kórse dep suraımyz», - dedi Tasqudyq aýylynyń turǵyny Erlan Toqmurzın.
Turǵyndar dál osy eski qubyrdan sý alyp júrgenderine 50 jyldan asa ýaqyt bolǵanyn aıtady. Biraq, jańadan sý munarasy salynǵanda bul jerden endi sý berilmeıtin shyǵar dep oılaǵanbyz deıdi. Alaıda, halyq jańa munaranyń tek salyndy degen aty bolmasa, sol baıaǵy eski qoımadan sý iship otyrǵandaryn aıtady. Ol azdaı 50 shańyraǵy, 250 turǵyny bar aýyl jurty jerden aqqan sýdyń ózine aı saıyn 550 teńgeden tólep otyrmyz deıdi. Al, 134 mıllıon teńgege salynǵan sý munarasy ádemi eskertkish bolyp tur dep ashýly.
Biraq, Sarqan aýdany ákimi orynbasary aýyldyqtardyń sózimen kelispeıdi. Sheneýniktiń aıtýynsha, jańadan salynǵan munara arqyly sýdy tartsa, halyq qosymsha sý sorǵyshty qosqan úshin jaryqqa aqsha tóleýi tıis. Al buǵan turǵyndardyń kóbi qarsylyq bildirdi deıdi. Eger kópshilik jaryqqa qarajat tóleıtin bolsa, munarany qosyp berýge saqadaı-saı daıyn kórinedi.
«Bes jyl boıy ol ortalyq sý qubyry sorǵyshy qosylmaǵan sebebi, halyq jaryqqa qosymsha aqsha tóleýi tıis. Sol sebepti qosylmaı turdy. Qazirgi tańda aýyl tolyq sapaly aýyz sýmen qamtamasyz etilip otyr. Keıbir úıde qysym bar, keıbir úıde qysym joq. Ortalyq sorǵysh qosylǵan kezde barlyq úıde qysym bolady», - dedi Sarqan aýdany ákiminiń orynbasary Jomart Myńbaev.
Endi ákimdik bes jyl boıy iske qosylmaǵan sý munarasyn 10 kúnniń ishinde qosyp beremiz deıdi. Al halyq az kúnniń ishinde máseleniń sheshile qoıatynyna senbeıdi. Tek iske jemqorlyqpen kúres agenttiginiń qyzmetkerleri kelip, memleket qarjysyna jasalǵan jumystyń nátıjesin kózben kórgenderin qalaıdy.
