Jetisý oblysynda 46 kásipkerdiń quqyǵy buzylǵan - Antıkor

TALDYQORǴAN. QazAqparat – Antıkor Jetisý oblysyndaǵy 46 kásipkerdiń quqyǵyn qorǵady, dep habarlaıdy QazAqparat tilshisi.

Sybaılas jemqorlyqqa qarsy is-qımyl agenttiginiń Jetisý oblysy boıynsha departamenti Ekologııalyq kodeks talaptarynyń saqtalýyna monıtorıng júrgizdi. Nátıjesinde Memlekettik kirister departamenti men Ekologııa departamenti ózara is-qımyldyń bolmaýyna baılanysty qoldanystaǵy zańnama talaptaryn tıisinshe qoldanbaıtyny anyqtaldy, bul kásipkerlerdiń quqyqtaryn buzýǵa ákep soqqan.

«Jetisý oblysy boıynsha qorshaǵan ortaǵa teris áser etkeni úshin salyq tóleıtin 4 633 operator bar. Onyń ishinde 46-sy – ІV sanatqa jatqyzylǵan shaǵyn jáne orta bıznes sýbektisi.

Salyq zańnamasyna sáıkes, Ekologııalyq kodekste aıqyndalǵan І, ІІ, ІІІ sanattaǵy operatorlar – tólemaqy tóleýshiler. Al, ІV sanattaǵy sýbektiler salyqtyń osy túrin tóleýden bosatylady. Bul rette ýákiletti organdar tarapynan tabıǵat paıdalanýshylardyń quqyqtarynyń buzylýyna jol bermeý jóninde ýaqtyly sharalar qabyldanbaǵan.

Birlesken sharalardyń nátıjeleri boıynsha 46 bıznes sýbektisiniń quqyǵy qorǵaldy. Endi olar qorshaǵan ortaǵa teris áser etkeni úshin salyq tóleýden bosatyldy», - delingen Sybaılas jemqorlyqqa qarsy is-qımyl agenttiginiń Jetisý oblysy boıynsha departamenti baspasóz qyzmetiniń habarlamasynda.