Jetisý oblysynda 40-qa jýyq otbasy apatty úıde turyp jatyr
Turǵyndar bir kúnde úıindiniń astynda qalamyz ba dep qorqady. Biraq ákimdik olardy qaýipsiz úıge kóshirýge asyqpaıdy. Sebebi, olardy qazir qonystandyra qoıatyn úı joq.
«Bıyl bizdiń úıdi apatty dep tanydy. Alaıda, áli osy jerde turyp jatyrmyz. Bılik bizge bir jaǵdaı bolǵanyn kútip otyr ma, túsiniksiz. Bizde sondaı sátten keıin ǵana qozǵala bastaıdy ǵoı», - dedi apatty dep tanylǵan úıdiń turǵyny Sháıgúl Malaeva.
Sháıgúl Malaeva ákimdiktiń qurǵaq ýádesinen sharshaǵanyn aıtady. Ol qabyrǵalary jarylyp, jaýyn jaýsa jan-jaǵynan sý sorǵalaıtyn úıdiń tesigin bitep sharshadym deıdi. Turǵyndar syz tartqan úıde balalary da aýyryp, sabaqtan jıi qalatynyna qınalady.
Al Kerbulaq aýdanynyń ákimi Qanat Esbolatov úılerdiń apatty dep tanylǵanyn rastady, biraq dál qazir turǵyndardy ózge úıge kóshire almaıtynyn jetkizdi. Sebebi, Saryózekte daıyn turǵan páter joq.
Aıta keteıik, Saryózek aýyly Kerbulaq aýdanynyń ortalyǵy bolyp tabylady.
«Keler jyly Saryózekte 60 páterli úı salynady dep josparlanýda. Ol baspanalar áleýmettik osal toptarǵa beriledi. Biraq biz Jetisý oblysynyń ákimi Beıbit Isabaevtyń atyna osy apatty degen úılerdiń turǵyndaryna jańa baspana berý máselesin usynaıyq dep otyrmyz»,- dedi Qanat Esbolatov.
