Jetisý oblysynda 256 mln teńgege jasalǵan sý júıesiniń rahatyn halyq kóre almady
Óıtkeni, áý basta tirshilik nári shyǵatyn jerdi sheneýnikter zerttemeı, birden jobalyq-smetalyq qujat jasap,munara ornatyp, qubyrlardy júrgizip tastaǵan. Al bul jumystardy júrgizýge 256 mln teńge jumsalǵan. Qazir Shanhanaı aýylynda osydan úsh jyl buryn jasalǵan munaranyń túkke paıdasy bolmaı qalǵan. Al, mamandardyń aıtýynsha, áýeli jerdiń sý mólsheri keminde 10 jylǵa jetetindigi zerttelip, tekserilýi kerek edi.
«Munara qazir eksponat bolyp tur, túkke paıdasy joq. Saıdaǵy sý sorǵyshty tereń qazǵan, onyń da túkke paıdasy joq, halyq sý ishpese, qandaı paıdasy bolady? Sóıtip aqshany qurtty, aqsha ketti», - dedi Shanhanaı aýylynyń turǵyny Rýslan Anarhanov.
Osylaısha aýyl halqy qazir bulaqtyń sýyn tutynyp otyr. Alaıda, jaýyn jaýsa sý laılanyp, ishýge jaramsyz bolyp qalatynyn oblysqa jańadan kelgen Turǵyn úı sharýashylyq basqarmasynyń basshysy da rastaıdy.
«Kóktemde sý tasqyny bolǵanda, jaýyn jaýǵanda, ol sý laılanady da, bir-eki apta aýylda sý bolmaı qalady», - dedi Jetisý oblystyq energetıka jáne TÚKSh basqarmasynyń basshysy Ernat Bázil.
Qazir Shoqan Ýálıhanov jerlengen Shanhanaı aýylyndaǵy sý máselesine Sybaılas jemqorlyqqa qarsy is-qımyl agenttigi kiristi.
«Bul boıynsha jergilikti atqarýshy organ der kezinde eshqandaı shara qoldanbaǵan. Qazir bul iste jemqorlyq kórinisteri bar ma, joq pa, nege osyndaı bolǵany tekserilip jatyr», - dedi Sybaılas jemqorlyqqa qarsy is-qımyl agenttiginiń Jetisý oblysy boıynsha departamentiniń basshysy Maqsat Jebegenov.
Endi halyqty taza tirshilik nárimen qamtamasyz etý úshin qaıta sý shyǵatyn jerdi anyqtamaq. Al oǵan taǵy qansha qarajat jumsalatyny belgisiz. Al aýylǵa sý munarasyn turǵyzyp ketken sheneýnikter qazir Kerbulaq aýdanynda jumys istemeıdi.
