Jetisý oblysynda 2 jańadan salynǵan, 2 kúrdeli jóndeýden ótken mektep ashyldy
Kóksý aýdany Besqaınar aýylyndaǵy Besqaınar orta mektebiniń oqýshylary Bilim kúnin jańa ǵımaratta qarsy aldy. 25 oryndy mektepke deıingi shaǵyn ortalyǵy bar 120 orynǵa arnalǵan jańa mektep zamanaýı jıhazdarmen, ınteraktıvti paneldermen, pándik kabınetteri barlyq qajetti tehnıka jáne jabdyqtarmen qamtylǵan. Mektep aýmaǵy abattandyryldy, fýtbol stadıony, hokkeı alańy, vorkaýt-alań, balalarǵa arnalǵan oıyn alańy bar. Qaýipsizdikti qamtamasyz etý maqsatynda beınebaqylaý ornatylǵan. Mektepte 12 synyp jıyntyǵynda 140 oqýshy oqıdy.
Qazaqstannyń 10 jyldyǵy aýylyndaǵy R. Tolqynbekuly atyndaǵy orta mektep oqýshylary da qos merekege qatar qýandy. Eski mektep ǵımaratynda tek 7 oqý bólmesi bar edi, májilis zaly men sport zaly múlde bolǵan joq. Endi bul másele sheshimin taýyp, materıaldyq-tehnıkalyq bazasy da tolyq jańartyldy. 120 oryndyq mektepke deıingi shaǵyn ortalyǵy bar jańa mektep ǵımaratynyń mańaıy abattandyrylyp, fýtbol stadıony, vorkaýt alańy men oıyn alańy jasalǵan. Mekteptegi 11 synyp jıyntyǵynda 81 oqýshy bar.
Jańa keıiptegi mektepter Qaratal jáne Kerbulaq aýdandarynda da iske qosyldy. Saryózek aýylyndaǵy 780 oryndyq №49 mektepti kúrdeli jóndeýge shamamen 727 mln teńge jumsaldy. Mektepte 878 oqýshy oqıdy.
Kalpe aýylyndaǵy mektep te kúrdeli jóndeýden ótkizilip, oǵan shamamen 1,6 mlrd teńge baǵyttaldy. Ótken oqý jylynda mundaǵy bilim berý sapasyn baqylaý kórsetkishi 65 paıyz bolǵan. Jóndeý jumystary kezinde balalar kórshi aýyldaǵy mektepke baryp-kelip oqydy, endi jańarǵan óz mektepterinde bilim almaq. Munda mýzyka, sýret jáne kompıýterlik grafıka sabaqtaryna arnalǵan barlyq qajetti synyptar bar. Mektepte ashana, sport zaly men akt zaldary, jeke sport alańdary bar stadıon qarastyrylǵan. Sonymen qatar, mektep aýmaǵynda 50 oryndyq balabaqsha ashyldy.
Jalpy, osy jyly Jetisý oblysynda 16 bilim berý nysanynda qurylys jumystary júrgizilip jatyr. 10 nysan iske qosylady dep josparlansa, sonyń 6-ýy iske qosyldy. Bul qatarda búgin ashylyp otyrǵan 3 bilim mekemesi de bar. Sondaı-aq, Kóksý aýdanyndaǵy 2 mektep, Qaratal aýdanynyń Úshtóbe qalasyndaǵy 30 oryndyq jataqhanasy bar 100 oryndyq gýmanıtarlyq kolledj ashyldy. Qalǵan 4 nysanda qurylys jumystary jalǵasyp jatyr.
Bıyl 6 bilim berý nysanynda kúrdeli jóndeý bastalyp, onyń 2-eýi búgin paıdalanýǵa berildi, qalǵandary jyl sońyna deıin kezeń-kezeńimen ashylady.
Atap ótsek, 2023 jyly oblystyń 58 mektebin jańǵyrtýǵa 2,9 mlrd teńge, oqýlyqtar satyp alýǵa 1,7 mlrd teńge bólindi, oqýlyqpen qamtamasyz etilý deńgeıi – 100%.
Óńirde 69 eldi mekennen 1 766 oqýshy tasymaldanady. Osy jyly 604,2 mln teńgege qosymsha 12 avtobýs satyp alý josparlanǵan, onyń 7-eýi bilim berý mekemelerine kúni keshe berildi. Qalǵan 5 avtobýs jyl sońyna deıin jetkiziledi.
Jalpyǵa birdeı oqytý qorynan jekelegen sanattaǵy 23 486 oqýshyny mektep formasymen jáne oqý quraldarymen qamtamasyz etýge shamamen 1 mlrd teńge bólindi. Bul rette jańa oqý jylynda bastaýysh synyptardyń 52 000 oqýshysy tegin ystyq tamaqpen qamtylady. Osy maqsatta jergilikti bıýdjetten 1,7 mlrd teńge bólindi.
Oblystyq bilim basqarmasynyń habarlaýynsha, aldyn ala esepteýlerge sáıkes jańa oqý jylynda Jetisý oblysynda oqýshylar sany shamamen 130 myń, birinshi synyp oqýshylary 13 500 shamasynda. Sondaı-aq, memlekettik tapsyrys boıynsha 4 myńnan astam stýdent qabyldandy, onyń 2400-i jumysshy mamandyqtary boıynsha oqıdy.
