Jetisý oblysynda 12 mln teńge zalal keltirgen alaıaq ustaldy
Jetisý oblystyq polıtsııa departamenti baspasóz qyzmetiniń málimetinshe, atalǵan fakt Kerbulaq aýdanynda tirkeldi.
Shilde aıynyń basynda 34 jastaǵy jergilikti turǵyn iri alaıaqtyq týraly polıtsııaǵa aryzdandy. Jábirlenýshi áıel Grýzııadan kólik ákelemin dep ýáde berip, senimge kirip, 2 mıllıon teńgeni ıemdenip alǵan tanys er adamǵa shara qoldanýdy talap etken.
Aýdandyq polıtsııa qyzmetkerleri kúdiktiniń kim ekenin anyqtady. Ol Almaty oblysynyń 35 jastaǵy turǵyny bolyp shyqty.
«Kúdikti ustalyp, polıtsııaǵa jetkizildi. Arnaıy tekserý kezinde belgili bolǵandaı, er adam buryn da bótenniń múlkin urlaǵany úshin jaýapqa tartylǵan. Qazirgi ýaqytta kúdiktiniń taǵy birneshe qurbany anyqtaldy. Aýyl turǵyndaryna keltirilgen shyǵyn búgingi kúni 12 mıllıon teńgeni qurady. Er adam ýaqytsha ustaý ızolıatoryna qamaldy», - delingen vedomstvonyń habarlamasynda.
