Jetisý oblysynda 103 myńnan astam oqýshy lagermen qamtylady

TALDYQORǴAN. QazAqparat – Bıyl Jetisý oblysynda balalardyń jazǵy saýyqtyrýyna shamamen 623 mln teńge bólinip otyr, barlyǵy 103 myńnan astam nemese oqýshylardyń 85,5%-yn qamtý josparlanǵan, dep habarlaıdy QazAqparat oblys ákiminiń baspasóz qyzmetine silteme jasap.

Oblystyq bilim basqarmasynyń málimetine qaraǵanda, osy jyly jergilikti bıýdjetten balalardy jazǵy saýyqtyrýǵa 622 mln 710 myń teńge bólindi. Bir balaǵa 45 myń teńge esebinen áleýmettik osal toptar sanatyndaǵy otbasylardan 13 838 oqýshyny maýsymdyq lagerlermen qamtý josparlanyp otyr.

Qazir 9 qala syrtyndaǵy lager, atap aıtqanda Tekeli qalasynda «Altyn Shaja», «Edelveıs», «Bastaý», Alakól aýdanynda «Shaǵala», Kóksý aýdanynda «Qarlyǵash», Eskeldi aýdanynda «Aınalaıyn», «Kóktóbe», Aqsý aýdanynda «Tamshybulaq», Panfılov aýdanynda «Qarlyǵash» balalardy qabyldaýǵa daıyndyq júrgizip jatyr.

Sonymen qatar, mektep janyndaǵy tamaqsyz lagerlermen – 43 423 bala, ekskýrsııalyq saıahattarmen – 5 640 bala, demeýshilerdiń kómegimen – 1 004, ata-ana qarajat esebinen – 38 573, qosymsha bilim berýmen – 780, barlyǵy 103 258 bala qamtylady dep josparlanǵan.