Jetisý oblysynan Senat depýtattyǵyna 11 kandıdat usynyldy
«15 shildede oblystyq saılaý komıssııasy barlyq 11 kandıdattyń Konstıtýtsııada jáne «Qazaqstan Respýblıkasyndaǵy saılaý týraly» Konstıtýtsııalyq zańda qoıylatyn talaptarǵa sáıkestigin tekserdi (joǵaryda kórsetilgen), barlyǵy sáıkes keledi, tıisti hattama jasaldy. 15 shildede kandıdattarǵa tańdaýshylardyń qoldaryn jınaý úshin qol qoıý paraqtary berildi. Senat depýtattyǵyna kandıdatty oblystyń barlyq máslıhattarynyń atynan ókildik etetin tańdaýshylardyń jalpy sanynyń (154) keminde on protsenti (keminde 15), biraq bir máslıhattan tańdaýshylar daýysynyń jıyrma bes protsentinen aspaıtyn daýyspen qoldaýǵa tıis. Tańdaýshylardy qoldaý olardyń qoldaryn jınaýmen kýálandyrylady.Toltyrylǵan qol qoıý paraqtary tıisinshe oblystyq saılaý komıssııasyna tapsyrylady, ol pasport qyzmetteriniń qyzmetkerlerin tarta otyryp, bes kún merzimde jınalǵan qoldardyń durystyǵyn tekserýdi júzege asyrady»,- dedi oblystyq saılaý komıssııasynyń múshesi Qaharman Jaqsylyq.
Aıta keterligi QR azamattyǵynda turatyn jáne onyń aýmaǵynda sońǵy on jyl boıy turaqty turyp jatqan adam Parlament depýtaty bola alady. Jasy otyzǵa tolǵan, joǵary bilimi jáne keminde bes jyl jumys stajy bar, tıisti oblystyń aýmaǵynda keminde úsh jyl turaqty turatyn adam Senat depýtaty bola alady. Al, zańda belgilengen tártippen ótelmegen nemese alynbaǵan sottylyǵy bar adam depýtat bola almaıdy. «Usynylǵandardyń ishinde: 1 – aýdan ákimi, 3 - memlekettik qyzmetshiler, 2 - kommertsııalyq qurylymdardyń qyzmetkerleri, 4 – bıýdjettik uıymdardyń qyzmetkerleri, 1 - qoǵamdyq birlestiktiń qyzmetkeri. Mamandyqtar boıynsha: oqytýshylar – 4, zańger – 2, dáriger – 1, agronom – 1, mehanık – 1, jýrnalıst – 1, basqalary – 1 adam. Úmitkerlerdiń eń jasy 1991 jyly týǵan(31 jas), jasy - 1963 jyly (59 jas) týǵan. 8 adam (72,7%) «Amanat« partııasynyń músheleri, 1 - «Aýyl« (9%), 2 (18,2%) - partııanyń músheligin kórsetpedi. Ulty boıynsha: 9 (81,8%) qazaq, 2 (18,2%) orys», - dedi Qaharman Erkinaıuly. 3 tamyz kúni saǵat 18.00-de kandıdattardy tirkeý aıaqtalady jáne tirkelgen kandıdattar úgit jumystaryna kirisedi. Osylaısha, 1 tamyzdaǵy jaǵdaı boıynsha 11 kandıdat usynyldy, 6 kandıdat tirkeldi.
Senat depýtatyn saılaý boıynsha daýys berý tańdaýshylardyń-máslıhattar depýtattarynyń birlesken otyrysynda ótedi.
Daýys berýge qatysqan tańdaýshylardyń elý protsentten astamynyń daýysyn alǵan kandıdat saılandy dep esepteledi.
Eske salsaq, 11 shildedegi Memleket basshysynyń Jarlyǵymen 2022 jylǵy 24 tamyzǵa QR Parlamenti Senatynyń depýtattaryn saılaý taǵaıyndaldy. QR Parlamenti Senatyna 2 depýtat saılanatyn bolady.
