Jetisý oblysyna 200-den astam dáriger qajet

TALDYQORǴAN. QazAqparat - Jetisý oblysynda dáriger tapshylyǵy máselesi áli de ózekti. Qazir óńirge 202 maman qajet, dep habarlaıdy QazAqparat tilshisi.

Jetisý óńirindegi medıtsınalyq uıymdarǵa 82 maman jumysqa ornalasqan.

Alaıda oblysqa áli de 202 dáriger jetispeıdi. Ol mamandardyń 157-i qalaǵa qajet bolsa, qalǵany aýyldarǵa kerek.

Jetisý oblystyq densaýlyq saqtaý basqarmasynyń basshysy Arman Djansengırovtyń aıtýynsha, kadr tapshylyǵy máselesin sheshý úshin mamandardy baspanamen qamtý, balalaryn balabaqshaǵa ornalastyrý sııaqty áleýmettik qoldaý qarastyrylǵan.

«Qazirgi ýaqytta Prezıdent tapsyrmasy boıynsha aýyldyq densaýlyq saqtaý salasyn jańǵyrtý boıynsha aýqymdy jumys atqarylyp jatyr. Onda densaýlyq saqtaý salasyn jańǵyrtý kelesi jyldan bastaý alady. Jetisý oblysy boıynsha josparǵa 59 nysan endi. Onyń ishinde 15 dárigerlik ambýlatorııa, 39 feldsherlik-akýsherlik pýnkt jáne 5 medıtsınalyq pýnkt bar. Sondaı-aq, bıyl oblystyń 6 aýdanynda 12 blok-modýldik konstrýktsııa ornatylýda. Onyń 5 nysany qazirgi ýaqytta qoldanýǵa berildi. Bul ortalyqtar Kóksý, Eskeldi jáne Alakól aýdandarynda ornalasqan. Qalǵan 7 nysan jeltoqsan aıynyń basyna deıin paıdalanýǵa beriledi» - dedi Arman Djansengırov.

Sonymen qatar, Jetisý oblysynyń medıtsınalyq mekemelerinde «Enbek.kz» elektrondy eńbek bırjasy turaqty túrde júrgizilip turady.

Usynylǵan bos jumys oryndaryna ár apta saıyn taldaý jáne jańartý júrgiziledi.

Úmitkerdiń biliktilik deńgeıine jáne kásibı quzyrettiligine qoıylatyn talaptarǵa sáıkes personaldy izdeý jáne irikteý júzege asyrylady.

Bıyl Jetisý oblysynyń medıtsınalyq uıymdaryna 82 dáriger kelip, «Enbek.kz» portaly arqyly qabyldanǵan.

2021-2022 jyldary biliktilikti arttyrý úshin oblys dárigerleri (akýsher-gınekologtar, anestezıologtar-reanımatologtar, nevropatologtar, psıhıatrlar) Túrkııa, Reseı, Belarýs sııaqty shet elderde bilim alǵan.

Búgingi tańda oblysta 361 medıtsınalyq uıym kómek kórsetedi.