Jetisý oblysy: jarylys bolǵan jylý qazandyǵy jańa salynyp jatqan mektepke tıesili

TALDYQORǴAN. QazAqparat - Jetisý oblysynda jańadan salynyp, sáýirdiń 20-sy kúni ákimdikke tapsyrylýy tıis bolǵan mekteptiń qazandyǵy jarylyp, bir adam mert boldy, - dep habarlaıdy QazAqparat tilshisi.

Oqys oqıǵa Qazaqstannyń 10 jyldyǵy aýylynda bolǵan. Mektep jańadan salynyp jatqandyqtan oqýshylar kórshi Terekti aýylyndaǵy T.Isabaev atyndaǵy bilim shańyraǵynda 2021 jyldan beri qatynap oqyp júrgen.

«Rahmetolla Tolqymbekuly atyndaǵy orta mektebiniń mert bolǵan qyzmetkeri Omarov Ardaq Ahymtaevıch 1965 jyly 30 qyrkúıekte dúnıege kelgen. Atalǵan mektepke 1995 jyly 1 qazanda jumysqa qabyldanǵan, osy ýaqytqa deıin jumysshy (raznorabochıı) bolyp istedi.

Jańadan salynyp jatqan mektep qurylysyna, demalys kúni baryp jylytý qazandyǵy ornalasqan ǵımaratqa kirgen. Kirgen ýaqytta jylytý qazandyǵy jarylǵan. Jarylystyń sebepterin Kóksý aýdanynyń ishki ister jáne tótenshe jaǵdaılar bóliminiń qyzmetkerleri anyqtaý ústinde»,- delingen Kóksý aýdany ákimdiginiń baspasóz qyzmetiniń habarlamasynda.

Vedomstvonyń aqparatyna sáıkes, jańadan salynyp jatqan mektep 120 oryndyq. Merzimi boıynsha merdiger osy sáýir aıynyń 20-sy kúni ákimdiktiń balansyna tapsyrýy tıis bolǵan.

Esterińizge sala keteıik, buǵan deıin Qazaqstannyń 10 jyldyǵy aýylynda qazandyq jarylyp, bir adam mert bolǵanyn habarlaǵan bolatynbyz.