Jetisý oblysy óziniń óńirlik tóltańbasyn qabyldady

TALDYQORǴAN. QazAqparat - Jetisý oblysynyń óńirlik gerbi konkýrs nátıjesinde iriktep anyqtaldy. Konkýrsqa sýretshiler, fotograftar, dızaınerler, arhıtektorlar jáne qarapaıym qala turǵyndary da qatysty. Jalpy 17 úmitkerden 55 eskız túsken, dep habarlaıdy QazAqparat.

Oblystyq qoǵamdyq damý basqarmasynyń málimetinshe, ólkeniń tarıhı-mádenı jáne geografııalyq erekshelikteriniń kórsetilýi, joǵary kórkemdik deńgeıi, biregeı dızaındyq sheshim, tústerdiń úılesimdigi men geraldıka talaptarynyń saqtalýy baǵalandy.

Konkýrstyq komıssııa músheleriniń sheshimimen Jetisý oblysy Taldyqorǵan qalasynyń qorǵanys isteri jónindegi basqarma bastyǵynyń áskerı patrıottyq jumys jáne Qarýly Kúshter ardagerlerimen jumys jónindegi kómekshisi, sonymen birge, QR Sýretshiler odaǵynyń múshesi, QR Kórkem akademııasynyń korrespontent múshesi, vıtse prezıdenti Dáýrenbekov Eset Jeńisulynyń eskız jobasy biraýyzdan tańdap alyndy.

Óńirlik tóltańba Qazaqstan Respýblıkasy Mádenıet jáne sport mınıstrligi Memlekettik rámizder jáne geraldıkalyq belgiler máseleleri jónindegi saraptama keńesinde saraptamadan ótip, oblystyq máslıhatta kelisildi.

Jer jannaty Jetisý oblysynyń gerbi sheńber ishinde ornalasqan, Memlekettik Týdyń kók jáne altyn túsine negizdelgen.

Negizgi nyshandardyń biri – shańyraq, Jetisý jeriniń asqarly, bıik taýlary, Taldyqorǵan qalasynyń sımvoly «Jetisý monýmenti», Uly Jibek Jolynyń nyshany – kerýen kóshi, jeti ózen, Balqash, Alakól kólderiniń aıdyny beınelengen.