Jetisý ǵalymdary Elbasy Joldaýyn talqylady
TALDYQORǴAN. QazAqparat - Taldyqorǵandaǵy Іlııas Jansúgirov atyndaǵy Jetisý memlekettik ýnıversıtetiniń oqytýshy-professor quramy Elbasy Joldaýyn ózara talqylady, dep habarlaıdy QazAqparat tilshisi.
Bul oqý orny shákirtteriniń 65 paıyzy bolashaq pedagog mamandary. Degenmen, ýnıversıtette agroónerkásiptik ǵylymdy damytýǵa da úlken kóńil bólinip otyr.
Almaty oblysy agrarly aımaq. Elimizdegi qant qyzylshasy, sonymen qatar maıburshaq pen júgeriniń basym bóligi osy Jetisý jerinde óndiriledi. Soǵan sáıkes ótken jyly ýnıversıtet janynan bıotehnologııalar ınstıtýty qurylyp, búgingi zaman talabyna saı jabdyqtalǵan jańa jylyjaı ashyldy. Jetisý óńirindegi eń úlken joǵary oqý orny aldaǵy ýaqytta tsıfrly ýnıversıtet júıesine kóshýdi josparlap otyr.
Ýnıversıtet prorektory Muhtar Tólegenov stýdentterdiń alǵashqy oqý jylynan bastap, qolynan dıplom alǵanǵa deıingi joly arnaıy elektrondy baǵdarlama arqyly baqylaýda bolatynan aıtady.
«Bul Elbasynyń jańa Joldaýynda aıtylǵan «Tsıfrlyq Qazaqstan» baǵdarlamasyna kóshýdegi naqty qadam», -deıdi prorektor.
Aıta keteıik, búgin QazaqstanRespýblıkasynyń Prezıdenti Nursultan Nazarbaevtyń Qazaqstan halqyna «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» Joldaýy jarııalandy.
