Jetisý dıhandary Astanaǵa arzan et, balyq, kókónis ákeldi
TALDYQORǴAN. QazAqparat - Almaty oblysynyń aýylsharýashylyq ónim óndirýshileri Astanaǵa 340 tonna ónim jetkizdi. Jármeńke «Qýatty óńir - qýatty Qazaqstan» aktsııasy aıasynda ótip jatyr.
Oblystyń 16 aýdany, úsh qalasy jáne «Jetisý» ÁKK 160 mln teńge bolatyn aýylsharýashylyǵy ónimin ákeldi. Elorda qonaqtary men turǵyndaryna aýylsharýashylyǵy óniminiń 38 túri usynylady: et jáne et ónimderi, balyq, jemis-jıdek pen kókónister, sút ónimderi, jumyrtqa, azyq-túlik jáne kondıterlik ónimder. Jármeńke Baýyrjan Momyshuly dańǵylynyń boıyndaǵy Oqýshylar saraıy aýmaǵynda 10-11 qyrkúıek kúnderi ótedi.
Aýylsharýashylyq jármeńkesindegi taýarlar quny qaladaǵy jekelegen baǵadan 15-20 paıyzǵa arzan. Jármeńkege qoıylǵan barlyq ónim veterınarlyq jáne sanıtarly-epıdemıologııalyq tekserýden ótken.
