Jetisý aýdanynyń 3 jyldyq jospary qoǵamdyq talqylaýǵa shyǵarylady

ALMATY. QazAqparat – Almatyda Jetisý aýdanynyń turǵyndary kósheler men aýlalardy abattandyrý, jaryqtandyrý, aýyz sýmen qamtamasyz etý jáne áleýmettik nysandardy salý máseleleriniń sheshilýin kútip otyr. Bul týraly aýdan turǵyndarymen eseptik kezdesýde belgili boldy, dep habarlaıdy QazAqparat tilshisi.

Jıynǵa Almaty ákimi Baqytjan Saǵyntaev qatysty.

Jetisý aýdanynyń ákimi Maqsat Qıqymov baıandaǵandaı, 2019 jyldyń qorytyndysy boıynsha aýdan tirshiliginiń negizgi salalarynda oń dınamıka qalyptasqan. Aýdan terrıtorııasynda 941 ónerkásip orny bar. Aýdan ónerkásiptik óndiris kólemi boıynsha byltyr birinshi oryndy ıelenedi.

Mysaly, 2019 jyly ol 4,7%-ǵa ósip, 216,7 mlrd teńgege jetti.

Sonymen qatar, aýdan bólshek saýda kólemi boıynsha 800,2 mlrd teńge aınalymmen birinshi orynda tur.

Aýdan turǵyndary úshin óte ózekti máseleniń biri – qoǵamdyq kóliktiń jumysy. Turǵyndardyń ótinishteri boıynsha №№ 17, 56 jáne 123 baǵyttardyń syzbalaryna ózgerister engizildi. № 46-shy baǵyttyń syzbasy ózgerdi. Byltyr 18 qyrkúıekten bastap Aınabulaq-2 yqshamaýdanyna qoǵamdyq kóliktiń qyzmetin kórsetý úshin №56 baǵyttyń syzbasy Kókmaısa yqshamaýdanynyń sońǵy aıaldamasynan Aınabulaq-2 yqshamaýdanyna deıin uzardy.

Byltyr tamyzda Almaty ákimimen kezdesý kezinde turǵyndardyń ótinishi eskerilip, jańa №208 avtobýs baǵyty quryldy.

Kemel yqshamaýdanynan shyǵyp, metronyń «Raıymbek batyr» beketine deıin baratyn marshrýt Kókjıek yqshamaýdanyn da qamtıdy. Bul baǵytty 2020 jyldyń aqpan aıynda iske qosý josparlanǵan.

Sonymen qatar, 2019 jyly 13 baǵyt boıynsha 220 eski avtobýs jańardy. Jańa úlgidegi 11 aıaldama ornatyldy. Bıyl munyń 30-dan astamy josparlanyp otyr.

Búginde aýdannyń 61 kóshesi ortalyqtandyrylǵan sý júıesinen tys qaldy. Bul problemany taıaýdaǵy 3 jyl ishinde sheshý kózdelip otyr.

Qoǵamdyq qaýipsizdikti qamtamasyz etý maqsatynda Almaty ákiminiń tapsyrmasy boıynsha Kókjıek yqshamaýdany men Esenov kóshesi 154/4 mekenjaıda polıtsııanyń 2 ýchaskelik pýnkti ashyldy. Polıtsııanyń 4 modýldi postysy jumys jasap keledi. Sonyń arqasynda azamattardyń ótinishteri der kezinde nazarǵa alynyp keledi.

Jıi kóteriletin máselelerdiń biri – jaryqtandyrý. Byltyr 56 kóshege bir jarym myń LED-shamdary ornatyldy. Bıyl aýdandy 100% jaryqtandyrý josparlanǵan.

2019 jyldyń tamyz jáne qarasha aılary aralyǵynda 100 aýlany abattandyrý boıynsha aýqymdy jumystar atqaryldy.

Workout-alańdarǵa jasaqtalyp, syrtqy jaryqtyń 564 baǵanasy ornatyldy jáne 20 fýtbol men basketbol alańy salyndy. 2020 jyly barlyq aýlalardy abattandyrý tolyq aıaqtalady.

Bıyl aýdandaǵy Kemel eldi mekeninde kúnine 200 adam keletin otbasylyq-dárigerlik ambýlatorııanyń qurylysyn bastaý kózdelip otyr. Sonymen qatar, №11 emhanany seısmıkalyq kúsheıtý men kúrdeli jóndeýdiń, Jumysshy kentinde 240 adam keletin emhana qurylysyn jáne 50 adam keletin áıelder keńesin, Aınabulaq-4 yqshamaýdanynda 160 oryndy balabaqsha, №43 mektep janynan qosalqy nysan, sport zal men ashana salýdyń, № 80, 129 mektep janynan seısmıkalyq kúsheıtýmen birge kúrdeli jóndeý ótkizýdiń jobalyq smetalyq qujattamasy daıyndalyp jatyr.

Qala ákiminiń tapsyrmasy boıynsha aǵymdaǵy jyldyń naýryzynyń sońyna deıin Jetisý aýdanyn damytýdyń úsh jyldyq sheberlik-jospary ázirlenetin bolady. 15 aqpanda qujat qoǵamdyq talqylaýǵa usynylady.