Jetisý aýdanynda bıyl 20 myń aǵash otyrǵyzylady
ALMATY. QazAqparat - Almaty ákimi Baqytjan Saǵyntaev jumys sapary barysynda Jetisý aýdanyn abattandyrý men kógaldandyrý jumystarymen tanysty, dep habarlaıdy QazAqparat tilshisi.
Qala ákimi «Kókjıek» jáne «Kókmaısa» shaǵynaýdandaryndaǵy skverlerde, Qazybaev kóshesindegi jaıaý júrginshiler aımaǵynda, №169 jáne №171 balabaqshalarda júrgizilip jatqan jóndeý jumystarynyń sapasyna baǵa berdi.
Abattandyrý jáne kógaldandyrý jumystary – qala ákimimen ótetin kezdesýlerde turǵyndardyń jıi kóteretin máseleleriniń biri.
Baqytjan Saǵyntaev qala turǵyndarynyń demalysy men ekologııany saýyqtyrý úshin qolaıly jaǵdaı jasaý qajettigine nazar aýdardy. Jetisý aýdanynda kóptegen qoımalar, ónerkásiptik kásiporyndar ornalasqan.
Osyǵan oraı, turǵyndardyń ótinishterine sáıkes, kógaldandyrý jáne belsendi demalýǵa arnalǵan oryn jasaý qolǵa alyndy. Eger byltyr 7 skver men 1 saıabaq aýdan turǵyndarynyń ıgiligine berilse, bıyl 12 skverdi abattandyrý josparlanyp otyr.
Baqytjan Saǵyntaev rekreatsııalyq aımaqtardy ǵana emes, sondaı-aq oǵan irgeles aýmaqtarǵa da kóńil bólýdi, retke keltirýdi tapsyrdy.
«Turǵyndardyń suranystaryna sáıkes ómir súrý, nátıjeli jumys jáne belsendi demalys úshin jaǵdaıdy jaqsartýdy jalǵastyramyz. Bul erekshe mıkroklımat qalalyqtardyń ómir súrýi men kóńil-kúıine oń áser etedi», - dedi qala ákimi.
Jańa jobalardy qaraý kezinde Jetisý aýdanynyń ákimi Maqsat Qıqymov qala ákiminiń Jasyl Almaty bastamasyn júzege asyrý aıasynda jasyl jelek qorynyń jaǵdaıyn jaqsartý úshin mıllıonǵa jýyq aǵash otyrǵyzylatynyn aıtty.
«Aýdanda 220 myń aǵash bar. Onyń 5 myńy sońǵy 3 jylda otyrǵyzyldy. Tekserý nátıjesinde byltyr otyrǵyzylǵan 1 myńǵa jýyq kóshettiń óspeı qalǵany anyqtaldy. Sondyqtan kelisimshart talaptaryna sáıkes merdiger uıymdar kúzde 2 myń kóshet otyrǵyzady. Sonymen qatar, Jasyl Almaty baǵdarlamasy aıasynda kúzde Jetisý aýdanynda taǵy 20 myń aǵash otyrǵyzylyp, 12 gúlzar abattandyrylady», - delingen qalalyq ákimdiktiń baspasóz qyzmeti taratqan habarlamada.
Jalpy Jetisý aýdanynda 2019 jyly aýla aýmaqtaryn jaryqtandyrý jumystary 60%-dan 88%-ǵa deıin oryndaldy. Bıyl bul jumystyń kórsetkishin 100% jetkizý josparlanyp otyr.
