«Jetisý Aryspen birge» aktsııasy bastaldy

TALDYQORǴAN. QazAqparat -Taldyqorǵanda «Jetisý Aryspen birge!» aktsııasy bastaldy. Osyǵan oraı, oblys ortalyǵynda gýmanıtarlyq kómek kórsetý pýnkti ashylyp otyr. Bul týraly óńirlik kommýnıkatsııalar qyzmeti alańynda ótken baspasóz máslıhatynda aıtyldy, dep habarlaıdy QazAqparat.

«Ózderińizge belgili, kúni keshe Túrkistan oblysy Arys qalasynda tótenshe jaǵdaı oryn alyp, turǵyndardyń jaqyn mańdaǵy eldi mekenderge kóshýine týra keldi. Sol jerde zardap shekken otandastarymyzǵa qoldaý kórsetý maqsatynda «Jetisý Aryspen birge» aktsııasyn bastap otyrmyz. Osy bir syn saǵatta jurt bolyp qoldaý kórsetip jibergenimiz durys dep oılaımyn», -deıdi Almaty oblysy azamattyq alıansynyń dırektory Eldar Saparov.

Onyń aıtýynsha, gýmanıtarlyq kómekti qabyldaý pýnkti shamamen bir aı kóleminde tańǵy saǵat 09:00-den keshki 21:00-ge deıin jumys istemek. Qoldaý aktsııasyn uıymdastyrýshylar Almaty oblysynyń atynan Arys qalasyna úlken kerýen baratynyn málimdedi. Osy oraıda Eldar Qaısaruly bul sharaǵa barlyq turǵyndardy belsendi qatysýǵa shaqyryp, múmkindiginshe kómek qolyn sozýdy usyndy.

Jalpy, zardap shekken arystyqtarǵa beretin eń qajetti zattardyń tizimi daıyndalǵan. Olardyń qatarynda konserviler, dándi daqyldar, makaron ónimderi, mıneraldy sý jáne balalarǵa arnalǵan kıimder men kórpe, jastyqtar bar.

Aıta keteıik, qabyldaý pýnktiniń mekenjaıy Taldyqorǵan qalasy Qabylısa jyraý kóshesi 127 úıde ornalasqan. Odan bólek, Túrkistan oblysynda osy jaǵdaıǵa baılanysty arnaıy korporatıvtik qor qurylǵan. Qarjylaı járdem bergisi kelgen azamattar aqshalaryn sol jerge aýdarýǵa bolady.