Jetisaılyq ustazdar bes kúndik demalysta 5 myń dana betperde tikken
JETІSAI. QazAqparat – Túrkistan oblysy Jetisaı aýdanynda ustazdar bes kúndik demalysta 5 myń dana betperde tikken. Bul maskalar aýdannyń jumyspen qamtý jáne áleýmettik baǵdarlamalar bólimine tapsyrylǵan, dep habarlaıdy QazAqparat tilshisi.
Aýdandyq jumyspen qamtý jáne áleýmettik baǵdarlamalar bóliminiń basshysy Ádilhan Ábjanovtyń aıtýynsha, bul maskalar halyqtyń osal toptaǵy azamattaryna tegin taratylǵan.
«Atap aıtar bolsaq, 141 otbasyna (712 adam), 182 jalǵyzbasty qart adamǵa, kámelet jasqa tolmaǵan múmkindigi shekteýli 267 balaǵa, odan keıin 18 jastan asqan 111 psıhonevrologııalyq aýytqýy bar azamattarǵa, ońaltý ortalyǵyndaǵy 81 balaǵa betperdeler berildi. Qalǵan betperdeler qajetine qaraı qosymsha muqtaj azamattarǵa tıisti bólim tarapynan beriletin bolady. Óz tarapymyzdan qıyn-qystaý kúnde qol qýsyryp otyrmaı, demeý kórsete bilgeni úshin aýdan ustazdaryna shynaıy rızashylyǵymyzdy bildiremiz»,- deıdi Ádilhan Ábjanov.
