Jetisaılyq turǵynnyń tandyrlary Orta Azııa elderinde suranysqa ıe
TÚRKІSTAN. QazAqparat – Túrkistan oblysy, Jetisaı aýdanynda turatyn Turǵynbaı Іzbasarov 60 jyldan beri tandyr jasaýmen aınalysyp keledi.
Búginde 78 jasqa kelgen aqsaqal Orta Azııa elderindegi sapaly tandyr jasaýshylardyń birine aınalyp úlgergen, dep habarlaıdy QazAqparat tilshisi.
Qazirgi tańda Turǵynbaı aqsaqaldyń shaǵyn tsehynda aıyna 100-ge jýyq túrli kólemdegi tandyr shyǵarylady. Munda 2 adam turaqty jumyspen qamtylǵan.
«Tandyr daıyndaý isin 17 jasymnan úırene bastadym. Alǵashynda Tashkent qalasyndaǵy ustalarǵa shákirt bolyp eńbek ettim. Keıinirek, Atakent kentinde 20 jyldaı turyp, osy kásiptiń berekesin kórdim. Búginde ózimniń densaýlyǵym syr bere bastaǵannan soń, bul kásipti balalarym men jıenderim myqtap qolǵa aldy», - deıdi aýyl aqsaqaly.
Qazirgi tańda shaǵyn tsehta qyzý jumys júrip jatyr. Munda tandyrdyń san túrin kezdestirýge bolady. Baǵalary da ártúrli. Eń arzany ıaǵnı shaǵyn tandyr – 3 myń teńge turady. Al adam boıymen birdeı úlken tandyrdyń baǵasy 30 myń teńgege deıin barady eken.
Sapaly tandyrǵa qajetti eń basty dúnıe – sary topyraq. Bul shıkizatty usta kórshi Saryaǵash aýdanynan satyp alamyn deıdi. Al, ekinshi shıkizattyń túri – kádimgi eshki men qoıdyń júni. Qalǵan tirlik topyraqty ıitý men ıleýinde. Turǵynbaı aqsaqal shaǵyn kásiporynnyń atyn «Tandyr» dep atapty. Munda ázirlengen tandyrdyń keminde 3 jyl tolyq paıdalanýǵa bolady.
«Ol úshin az ǵana kútim kerek. Bastysy – satyp alǵan adamdardyń alǵysyn alyp júrmiz. Tapsyrys berýshilerdiń qatary jyl sanap artyp otyrǵanynyń kepili biz jasaǵan tandyrlardyń sapasynda dep oılaımyn»,- deıdi Turǵynbaı Іztileýov.
Osy jyldar aralyǵynda usta qanshama shákirt tárbıelep, úıretken. Búginde onyń qolynan shyqqan tandyrlar kórshiles Ózbekstan, Tájikstan elderinde saýdalanady. Al, elimizde Almaty, Astana, Shymkent qalalary men Qaraǵandy, Pavlodar, Túrkistan oblystaryna keńinen qoldanysta júr.
