Jetisaılyq turǵyn aýla sypyrýshy jalǵyzbasty anaǵa baspana syılady

JETІSAI. QazAqparat - Túrkistan oblysy Jetisaı aýdanynyń turǵyny jalǵyzbasty anaǵa 5 bólmeli úıdi syıǵa tarty. Eki qyz ósirip otyrǵan Nazgúl Shadmanova baspanaǵa qol jetkize almaı kele jatqanyna birneshe jyl bolǵan, dep habarlaıdy QazAqparat tilshisi.

Taǵdyrdyń taýqymetin tartqan ana jomarttyq tanytqan azamatqa sheksiz alǵysyn bildirdi. Ol Jetisaı qalasyndaǵy ortalyq bazarda aýla sypyryp, qyzdaryn asyrap júr. Tapqany páteraqy men azyq-túlikten artylmaıdy. Kelinshek kúndiz-túni ýaıymǵa salynyp kelgenin jasyrmaıdy. Endi kútpegen jerden baspanaly bolyp, qýanyshqa keneldi.

«Jańa úıge qajetti jıhazdary men azyq-túligine deıin berip otyr. Endi bar tapqanymdy qyzdarymdy taryqtyrmaı ósirýge jumsaımyn. Igi is jasap otyrǵan azamattarǵa alǵystan basqa aıtarym joq», – deıdi N.Shadmanova.

Al, qaıyrymdy istiń bastamashysy bolǵan - «Nár-Tamshy» qoǵamdyq qaıyrymdylyq qorynyń tóraǵasy Ermahan Rahmatýlla. Ol buǵan deıin óz qarajaty esebinen 10-ǵa jýyq otbasyǵa baspana tartý etken bolatyn. Aıta keteıik, búginde Jetisaı aýdanynda 80 gektar jerge 200 páterli 6 kópqabatty úı salynýda. Jyl sońyna deıin birqatar úıdiń qurylysy aıaqtalyp, ondaǵy páterler baspana kezeginde turǵan az qamtylǵan otbasylarǵa úlestiriledi dep josparlanyp otyr.