Jetisaılyq sheber 20 jylda 800-den astam dombyra jasaǵan

TÚRKІSTAN. QazAqparat – Jetisaı qalasynda 20 jylda 800-den astam dombyra jasaǵan sheber turady. Onyń qolynan shyqqan buıymdardy elge tanymal azamattar úlken sahnalarda qoldanyp júr, dep habarlaıdy QazAqparat tilshisi.

Oktıabr Aǵmanovtyń - negizgi mamandyǵy qurylysshy. Degenmen, jigit aǵasynyń kirpish qalap, úı soǵatyn kezderi az. Kóbinese aǵashtan ár túrli dúnıe jasaıdy. Jastaıynan janyna jaqyn bolǵan bul hobbıin óse kele jeke kásipke aınaldyrǵan. Qazir dombyra jasap, satyp júr.

«Negizinde jaqsy dombyra 4-5 túrli aǵashtan jasalady. Men ózimizde ósetin jańǵaq, qara tal sekildi aǵashtardy qoldanamyn. Qajetti dúnıeler daıyn bolsa, bir dombyrany 3-4 kúnde jasaýǵa bolady. Biraq sheberlerde ondaı múmkindik bola bermeıdi. Qurap qoıyp, basqa sharýalarymen aınalysasyń. Sondyqtan bir dombyrany kem degende bir apta jasaımyz», – deıdi ol.

Aǵash sheberiniń aıtýynsha, dombyranyń baǵasy onyń ólshemine, tapsyrys berýshiniń talaptaryna, jasalǵan materıaly men ustanyń eńbegine baılanysty baǵalanady. Sondyqtan, ár aımaqtaǵy dombyralardyń baǵasy da ár qıly bolyp keledi.

«Arasynda syıǵa ketetinderi bar. Aǵaıyn týysqa arnap tegin jasap beretin sátterimiz de kóp. Sonymen qatar, syıly qonaqtar úshin arnaıy tapsyrys beretinder de kezdesip jatady»- deıdi Oktıabr Baıbaquly.

Sheber ulttyq aspapty ózindik talǵammen jasaıdy. Oıý-órnekterin de qashap, tapsyrys berýshiniń talǵamyna saı ózi syzady. Kóp oqyp, kóp izdenedi. Sondyqtan erekshe keskinmen sándep, árlep otyrady.

«Sapaly dombyra jasaý úshin aǵashtyń jaqsylap kebýi mańyzdy. Uzaq kepken aǵash bolsa tipten jaqsy» - deıdi ol.

Búginde Oktıabr Aǵmanov úıiniń bir bólmesin sheberhanaǵa aınaldyryp alǵan. Onda jumysyna qajetti qurylǵylardy ornatqan. Bos ýaqytyn osynda ótkizedi. Al, aldaǵy ýaqytta memleketten qaıtarymsyz qarjy alyp, kásibin keńeıtýdi josparlap otyr. Sol sátte dombyradan bólek astaý, qasyq, kese, sandyq sekildi zattardy da jasap, saýdaǵa shyǵarmaq.