Jetisaılyq sharýalar jıyn-terim naýqany aldynda ózekti máselelerdi talqylady

JETІSAI. QazAqparat – Túrkistan oblysy Jetisaı aýdanynda sharýalar jıyn-terim naýqanynyń aldynda ózekti máselelerdi talqylady. Egistik alqabyna jınalǵan turǵyndar maqtaǵa sýbsıdııa alý máseleleri men terim kombaıyndarynyń daıyndyq jaıyn sóz etti, dep habarlaıdy QazAqparat tilshisi.

Jıynǵa aýdan ákimi Jamantaı Beısenbaev pen aýdandyq máslıhattyń hatshysy Álıhan Ýtanov, oblystyq maslıhat depýtaty Sádý Bekenov pen qala, kent jáne aýyl ákimderi, maqta sharýa qojalyǵynyń tóraǵalary, maqta óńdeý zaýyttarynyń basshylary men BAQ ókilderi qatysty. Kúzgi maqta terim naýqanyn tıimdi ári nátıjeli etip aıaqtaýdy kózdegen sharýalar qabyldaý beketteri men zaýyttaryndaǵy zerthanalyq jumystardy kúsheıtýdi surandy.

Sharada sonymen qatar maqta baǵasynyń turaqty ári sharýalarǵa tıimdi bolýyn qamtamasyz etý máselesi talqyladyn. Jıyn-terim jumystaryna qajetti tehnıkalardyń daıyndyǵy men maqtany qýratý arqyly ónimdi erterek jınap alý tóńireginde áńgime qozǵaldy. Semınarda sóz alǵan aýdan ákimi maqta qabyldaý beketterindegi tarazylardyń durystyǵyn baqylaý qajettigin jáne tehnıkalyq qaýipsizdik sharalaryna asa mán berý qajettigine toqtaldy.

«Bıyl maqtanyń kesh egilýine baılanysty defolıatsııa sharalaryn jasaýdy erterek qolǵa alý kerekpiz, odan keıin árbir sharýa sýbsıdııa alýy úshin tergen ónimin tek arnaıy maqta zaýyttaryna ótkizýi kerek, sol kezde ǵana tonnasyna 12 myń teńgeden sýbsıdııa alýǵa bolady. Eldegi sharýalarǵa osy aqparatty jetkizýdi jedeldetý kerekpiz, sebebi 1 teńge bolsa da paıdasyn sharýa kórýi kerek jáne zaýyt basshylary da óz tarapynan sharýalarǵa jaǵdaı jasaýdy qolǵa alýy tıis»,- dedi aýdan ákimi Jamantaı Beısenbaev.

Jıynda sóz alǵan maqta zaýytynyń basshylary aldaǵy jıyn-terim naýqanyna maqta qabyldaý beketteriniń daıyn ekendigin, sharýalarǵa aldyn-ala maqta terýi úshin 150 mıllıon teńgege jýyq qarajat berilgendigin aıtty. Sonymen qatar maqta zaýytynyń basshylary baǵanyń Lıverpýldegi bırjaǵa baılanysty bolatynyn jáne dál qazirgi ýaqytta naqty baǵasynyń shyqpaǵanyn atap ótti.

Hımııalyq preparatty tasymaldaýshy kásipkerler, qaı ýaqytta qandaı preparatty qoldanýǵa kerektigin, satyp alar kezde hımııalyq preparattyń sapaly ekendigine qalaı kóz jetkizýge bolatynyn aıtyp ótti. Ony sapasyz ónim satýmen aınalysatyn alypsatarlardan emes, arnaıy tasymaldaýshy kompanııalardan alýǵa shaqyrdy.