Jetisaılyq sharýalar sýdan tapshylyq kórmeıdi – aýdan ákimdigi
JETІSAI. QazAqparat – Túrkistan oblysynyń Jetisaı aýdanynda búginge deıin 10 myń gektar «aq altyn» alqaby sýaryldy. Jergilikti sharýalar aǵyn sýdan tapshylyq kórip otyrǵan joq. Bul týraly aýdan ákimdigi málimet taratty, dep habarlaıdy QazAqparat tilshisi.
Jetisaı aýdandyq aýyl sharýashylyǵy bóliminiń basshysy Marat Ábýovtyń sózinshe, «Dostyq» jáne «Táýelsizdiktiń 20 jyldyǵy» atyndaǵy kanaldardan sekýndyna 52 tekshe metr aǵyn sý kelip jatyr. Bul kólem sharýalardyń suranysyn tolyq qanaǵattandyryp otyr.
«52 tekshe metr sýdyń 20 tekshe metrin «Táýelsizdiktiń 20 jyldyǵy» kanaly berse, qalǵany «Dostyq» kanalynyń enshisinde. Qazybek bı aýyl okrýginiń sharýalary táýligine 98 gektar maqta alqabyn sýaryp úlgerýde. Al, jalpy sýarylǵan alqap 665 gektardy quraıdy»,- deıdi Marat Ábýov.
Máselen, «MAK» sharýa qojalyǵynyń tóraǵasy Muhtar Botabekovtiń 17 gektar maqta alqabyna sý jibergenine búgin 3 kún bolǵan. Sharýa júıeli jumystardyń arqasynda egin sýarýdan qınalmaı jatqanyn aıtady.
«Aǵyn sýdan tapshylyq joq. Kanalda sý jetkilikti. Qazir biz jappaı sýarýdy bastap kettik. Aldaǵy aptada maqtanyń birinshi sýyn berip bitemiz»,- deıdi Muhtar Botabekov.
Bıyl qojalyq maqtadan bólek 3,5 gektar jerge «Jıenbaı» qaýynyn ekken. Qaýyn aldaǵy aptada tolyǵymen pisip jetilmek.
Maqta alqaptaryn sýarýda Jańaaýyl aýyl okrýginiń sharýalary da ilkimdilik tanytýda. Búginge deıin munda 842 gektar «aq altyn» alqaby sýarylǵan. Aıta keteıik, bıylǵy jyly Jetisaı aýdanynda 45 myń 100 gektarǵa maqta egilgen.
