Jetisaılyq sharýalar alǵashqy qarbyzyn Reseıge jóneltti
JETІSAI. QazAqparat – Túrkistan oblysy Jetisaı aýdanynyń sharýalary alǵashqy qarbyzyn Reseıge jóneltti. Kórshi elge eksportqa jiberilgen baqsha ónimi Maqtaly aýyldyq okrýginiń dıqandaryna tıesili, dep habarlaıdy QazAqparat tilshisi.
Jetisaı aýdanyna qarasty «Tyń» aýylynyń dıqany Bekjigit Múıtenbaev óz ıeligindegi 1 gektar jerge erte pisetin qarbyz ekken. Kóp jyldan beri jerine baqsha ónimin egip, ony saýdalap júrgen dıqan ótken jyldarmen salystyrǵanda bıyl jer ana ónimdi jaqsy bergenin aıtady.
«Naýryz aıynyń basynda qarbyzdyń 70 kúnde pisetin «Dolbyı» atty surpyn eki qabat plenka astyna ektik. Aýa raıy qolaısyz bolǵan kezderde ýaıym boldy. Alaıda barlyǵy oıdaǵydaı ótti. Ónim jerde qalǵan joq. Baǵasy da kóńilimnen shyqty», - deıdi sharýa.
Aıta keteıik, bıyl atalǵan aýdanda aýylsharýashylyǵy maqsatynda 78 500 gektar aýmaqqa egis egildi. Sonyń 10 636 gektaryna - plenka astyndaǵy qaýyn, al 2819 gektarǵa - qarbyz egilgen.
Búgingi kúnge deıin 45 gektar aýmaqtyń qarbyzy men 11 gektardyń qaýyny piskeli tur.
