Jetisaılyq sharýalar 80 tonna qyryqqabatty Reseıge jiberdi

TÚRKІSTAN. QazAqparat- Jetisaı aýdanyndaǵy Yntymaq aýyldyq okrýginde ornalasqan «Komıljon» sharýa qojalyǵy qyryqqabattyń alǵashqy ónimderin kórshiles Reseı eline eksporttady, dep habarlaıdy QazAqparat tilshisi.

Aqpan aıynda sharýa Komıljon Dadaev 12 gektar jerge qyryqqabattyń erte pisetin «Pekın», «Magnýs», «Zarısma» sorttaryn ekken bolatyn. Qazir alqaptaǵy 50 kúnde pisetin qyryqqabattyń «Pekın» sorty óz ónimin berip jatyr.

«Búgingi tańda 2 gektar jerden alynǵan ónim kólemi 80 tonna boldy. Shyǵyndarymyz tolyqtaı aqtaldy dep aıta alamyz. Qyryqqabatty kórshi Reseı memleketiniń astanasy Máskeý qalasyna satýǵa jiberip jatyrmyz», - deıdi «Komıljon» sharýa qojalyǵynyń tóraǵasy Komıljon Dadaev.

Jetisaı aýdanynda bıyl 900 gektar aýmaqqa erte pisetin qyryqqabat egilip, boljam boıynsha 30 myń tonna ónim alý josparlanyp otyr. Egilgen ónimniń basym bóligi - «Zarısma», «Valıkor», «Magnýs», «Kevın Farao», «Pekın», «Rında», «Zakaz» sorttary.

«Ótken jyly aýdan dıqandary 1000 gektardan astam jerge qyryqqabat daqylyn egip, 31,5 myń tonna ónim aldy. Negizinen erte pisetin qyryqqabattyń basym bóligi Reseı, Belorýs jáne Eýropa elderine eksporttalady», - deıdi Jetisaı aýdany aýyl sharýashylyǵy jáne jer qatynastary bóliminiń bas mamany Nurtas Tursynbekov.