Jetisaılyq sharýa ár naýqan saıyn 100 adamdy jumyspen qamtıdy

JETІSAI. QazAqparat – Túrkistan oblysy Jetisaı aýdanynda sharýa qojalyǵynyń tóraǵasy Safıddın Musaev naýqan saıyn 100 adamdy jumyspen qamtamasyz etip otyr. Qazir sharýanyń ıeliginde 14 gektar egistik jeri men 20 bas asyl tuqymdy jylqy bar, dep habarlaıdy QazAqparat tilshisi.

Maqtaly aýyldyq okrýgine qarasty «Jaılaýkól» eldi mekeniniń turǵyny sondaı-aq bir mezette 80 bas maldy bordaqylaı alatyn qora-jaıdan edáýir tabys taýyp keledi.

«Eńbekke erte aralastym, ata-anam sharýa kisiler boldy. Tańnyń atysy mal baǵýǵa ketetinbiz. Onyń ústine kishkentaı kúnimnen mal sharýashylyǵyna qyzyǵyp óstim. Óskende ózimniń fermam bolady dep armandaýshy edim. Minekeı, búgin elimizde júrgizilip jatqan sharýalardy qoldaýǵa arnalǵan baǵdarlamalardyń arqasynda osyndaı kúnge jettim. Odan bólek, 20 bas asyl tuqymdy jylqylaryma qaraıtyn adamdarǵa 200 myń teńgege deıin qarajat beremin. Bul jerde jumys isteıtin adamdardyń kóbisi - óz aýylymnyń turǵyndary. Sondyqtan bir teńge bolsa da, elde qalǵany durys»,- deıdi Safıddın Musaev.

Qazirgi tańda «S Tastan Ata» sharýa qojalyǵy bir jerden eki ret ónim alýdy myqtap qolǵa alǵan. Erte kóktemde jerine qyryqqabat ekse, artynsha onyń ornyna kúzdik daqyldar men maqta, kartop egip, ónimin alady.

Jumystyń qyzǵan shaǵynda atalmysh sharýa qojalyqta 100-ge jýyq adam qyzmet etedi. Qojalyq tóraǵasy tapqan tabysyn tek ózine ǵana jarata bermeı, qaıyrymdylyq is-sharalarǵa da belsendi atsalysyp júr.