Jetisaılyq polıtseıler marafon ótkizdi
JETІSAI. QazAqparat – Túrkistan oblysy, Jetisaı aýdanynyń polıtseıleri júgirýden marafon ótkizdi, dep habarlaıdy QazAqparat tilshisi.
Sharada aýdandyq polıtsııa bóliminiń bastyǵy, polıtsııa polkovnıgi Ermahan Abdramanov sóz sóılep, marafonnyń Túrkistan oblystyq polıtsııa departamentiniń bekitken is-shara josparyna sáıkes ótip jatqanyn atap ketti.
«Sport – árbir azamattyń belsendiligin arttyryp, densaýlyǵyn nyǵaıtýǵa negiz bolatyn dúnıe. Sondyqtan, biz bul baǵytty kún tártibinen túsirgen emespiz. Bizdiń jeke quramnyń jigitteri aýdan, oblys kóleminde ótetin túrli sporttyq saıystarda top jaryp, júldeli oryndarǵa ıe bolyp júr. Búgingi ótken marafon – tártip saqshylarynyń salaýatty ómir saltyn qoldaıtyndyqtarynyń birden-bir dáleli», - dedi polıtsııa bóliminiń bastyǵy Ermahan Abdramanov.
Aýdan ortalyǵy Jetisaı qalasyndaǵy «Qajymuqan» ortalyq stadıonynan bastaý alǵan marafonda tártip saqshylary men ózge de qatysýshylar Qojanov kóshesin aınalyp ótti. Sóıtip bas-aıaǵy 10 shaqyrymdyq qashyqtyqty baǵyndyrdy.
