Jetisaılyq polıtseıdiń jelide taraǵan vıdeosy ótken jylǵy oqıǵa bolyp shyqty

TÚRKІSTAN. QazAqparat- Jetisaılyq polıtseıdiń jelide taraǵan vıdeosy ótken jylǵy oqıǵa bolyp shyqty, dep habarlaıdy QazAqparat tilshisi.

Áleýmettik jelide polıtsııa qyzmetkeriniń bazarda beınekameramen túsirilim jasap turǵan vıdeosy tarady.

Onda tártip saqshysy qoǵamdyq orynda temeki shekken turǵynǵa hattama toltyrmaq bolady.

Kópshilikke qyzmettik kýáligin kórsete almaǵan polıtseı turǵyndarmen tildeskende de qyzmettik etıkany saqtamaıdy.

Jalpy oqıǵa Jetisaı qalasynda bolǵan.

Túrkistan oblysy polıtsııa departamentiniń baspasóz qyzmeti atalǵan beınejazba birden nazarǵa alynyp, tıisti tekserý jumystary júrgizilgenin habarlady.

«Bul jaıt 2022 jyldyń sáýir aıynda Jetisaı qalasy bazarlarynyń birinde bolǵan. Polıtsııa qyzmetkerine azamattarmen qarym-qatynas kezinde zańdylyqty saqtaý boıynsha túsindirý jumysy júrgizildi» delingen aqparatta.