Jetisaılyq dıqandar egin egýde jańa tehnologııany qoldanady

TÚRKІSTAN. QazAqparat - Jetisaılyq dıqandar egin egýde jańa tehnologııany qoldanady, dep habarlaıdy QazAqparat tilshisi.

Bıyl Jetisaı aýdanynyń dıqandary egin egýde jańa tehnologııa qoldanyp, ǵylymı jańalyqtardy qoldanysqa endiredi.

Bul joba eń aldymen sýdy únemdeýge úlken múmkindik bermek.

Búgin ashyq aspan astynda semınar ótip, dıqandarǵa jańa tásildiń qyr-syry túsindirildi.

Jıynda lazerli tegistegish arqyly sharýalarǵa aǵyn sýdy únemdeý men maqtanyń «Maqtaaral-5027» jańa tuqymynyń tıimdiligin tanystyryldy.

«Lazerli tegistegish tásilin qoldanǵan sońǵy 3 jylda jer aıdaýdy toqtatqanbyz. Jerdi tegistep, 2-3 márte alatyn jazǵy sýymyzdy da bir-aq ret alamyz. Qysqy sor shaıý jumystaryn júrgizý kezinde jerdi 70-80 santımetrge deıin tereń qopsytyp, 10-15 santımetrine deıin sý qoıamyz. Buǵan deıin qysqy sor shaıý jumystary kezinde gektaryna 8 tekshe metrge deıin aǵyn sý paıdalansaq, qazir gektaryna 3,5-4 tekshe metr ǵana sý paıdalanamyz. Mundaı ádisti 7-8 jylda bir qoldaný kerek» deıdi ol.

Semınar barysynda maqta zııankesterine tózimdi «Maqtaaral-5027» jańa sortynyń tanystyrylymy ótti.

Mamandardyń aıtýynsha, 117-119 kúnde pisetin maqtanyń ónimdiligi gektaryna 42-45 tsentnerdi qurasa, talshyq shyǵymdylyǵy – 38,7%.

Jańa sortty aınalymǵa engizý arqyly asa qaýipti zııankesterge qarsy óńdeý shyǵyny azaıady.

Maqta ónimdiligin arttyra otyryp, qosymsha tabysty gektaryna 160 myń teńgege jetkizýge bolady.