Jetisaılyq batyr ana 24 balasynan 70 nemere, 20 shóbere súıip otyr

TÚRKІSTAN. QazAqparat- Jetisaıda 24 balasy, 70 nemere, 20 shóberesi bar aq jaýlyqty ana turady, dep habarlaıdy QazAqparat tilshisi.

Túrkistan oblysy - batyr analardy túletken berekeli óńir. Oblysta altyn qursaqty analar kóp. Solardyń biri – 76 jastaǵy Saparkúl Ábýtálipova 24 balany dúnıege alyp kelgen.

Jetisaı aýdanynyń Qaraózek eldimekeninde turatyn kópbalaly ana eńbekke jastaıynan aralasqan.

«Adamdy adam etken - eńbek» deıdi. Jas kezimizden eńbekpen shuǵyldandyq. Joldasym Jolaman ekeýmiz sovhozdyń malyn baqtyq. Mal sharýashylyǵynda otaǵasy aǵa shopan, men kómekshisi bolyp istedim. Januıaly bolyp, 24 balany dúnıege ákeldik. Ókinishke qaraı, ómirdiń túrli synaǵyna tap bolyp, 12 balam qaıtys boldy. Allaǵa shúkir deımin, qalǵanynyń barlyǵyn aıaqtandyrdyq, qatarynan kem qylmadyq. Nemere súıip, shóbereniń qolynan maı jalap otyrmyz», – deıdi aq jaýlyqty ana.

Saparkúl Ábýtálipova búginde 70 nemere men 20 shóberesiniń qyzyǵyn kórip otyr. Ózi ómirinde bir ret úshemderdi, eki ret egizderdi dúnıege alyp kelgen. Qazir ul-qyzdary qosaqtarymen áýlettiń dáýletin asyryp, altyn qursaqty ananyń aq batasymen urpaq órbitip keledi.

«Batyr ana» medalin 1979 jyly 17-shi perzentimdi dúnıege ákelgende aldym. Al, ekinshi «Altyn alqany» omyraýyma táýelsizdik tańy atqan soń taqtym. Qazir ul- qyzdarym Astana, Almaty, Shymkent qalalary men Túrkistan oblysynda óz isteriniń sheberi atanyp, kásipterin dóńgeletip, násipterin taýyp júr»-deıdi ol.

Búginde batyr ana joldasy ekeýi kenje uldarynyń shańyraǵynda turady.