Jetisaılyq ájeler maska tigip, turǵyndarǵa tegin taratyp jatyr
JETІSAI. QazAqparat – Túrkistan oblysy, Jetisaı aýdanyndaǵy ájeler alqasy elde bolyp jatqan jaǵdaıǵa óz úlesterin qosýda. Zeınet jasyndaǵy analar jumyspen qamtý jáne áleýmettik baǵdarlamalar bólimine ózderi tikken maskalardy tabys etti, dep habarlaıdy QazAqparat tilshisi.
Jetisaı jerinde betperde tapshylyǵy bolmasa da kópbalaly jáne az qamtamasyz etilgen otbasylar men múmkindigi shekteýli jandarǵa demeýshiler tarapynan gıgıenalyq jáne jeke bas tazalyǵyn saqtaý quraldary tegin taratylýda.
«Bizdiń bul áreketimizdi ózge jas analar men arý qyzdarymyz qoldaýy kerek. Keste tige alatyn qyzy bar úıdiń adamdary betperde joq dep aıtýy uıat. Elge kelgen náýbetti el bolyp jumyla kóterýimiz tıis»,- deıdi aýdandyq ájeler alqasynyń tóraıymy Aıjamal Qońyrbaeva.
Ájelerdiń qolynan shyqqan 700 betperde aýdandaǵy osal toptaǵy azamattarǵa tegin úlestiriletin bolady.
«El basyna kún týǵanda qol qýsyryp otyrmaı, demeý kórsete bilgeni úshin aýdanymyzdyń aqjaýlyqty ájelerine shynaıy rızashylyǵymyzdy bildiremiz. Bul maskalar turmysy tómen otbasylarǵa tegin taratylatyn bolady»,- deıdi jumyspen qamtý jáne áleýmettik baǵdarlamalar bóliminiń basshysy Ádilhan Ábjanov.
