Jetisaıdyń qarbyzdary Reseıge eksporttala bastady
JETІSAI. QazAqparat - Túrkistan oblysy Jetisaı aýdany Jaılaýkól eldi mekeniniń dıqany Sovet Tastanuly búgin qarbyzdyń alǵashqy 40 tonnasyn Reseıdiń Novosibir qalasyna jóneltti. Bul týraly QazAqparat ákimdiktiń baspasóz qyzmetine silteme jasap habarlaıdy.
Jıyrma jyldan beri dıqanshylyqty kásip etken baǵban naýryz aıynda 4 gektarǵa qarbyzdyń «Ataman» sortyn ekken. Qazirdiń ózinde ónim kólemi gektaryna 30 tonnany qurap otyr deıdi ol. «Erte qamdansań, erte satasyń» degen qaǵıdany ustanǵan Sovet Tastanuly qarbyzdyń ár kelisin egistik basynan 220 teńgeden saýdalap otyr.
«Bıyl aýdanymyzdyń klımaty dıqanshylyqqa óte qolaıly boldy. Sonyń arqasynda naýryz aıynyń alǵashqy beskúndiginde plenkaly qarbyz ektik. Egistik alqabynyń ár gektaryna shamamen 1 mln teńgeden shyǵyn shyǵardyq. Aýa-raıynyń qarasqandyǵynan búgin mine alǵashqy ónimimizdi saýdalap otyrmyz», - deıdi Sovet Tastanuly.
Dıqannyń qarbyz alǵashqy ónimi emes. Budan 15 kún buryn ol 4 gektar qyryqqabat alqabynan 100 tonnadan astam ónim alyp úlgergen. Kelisin 150-180 teńgeden satypty. Artynsha maqta egip, ıaǵnı bir jerge ekinshi daqyldyń dánin seýip otyr.
Qazirgi tańda «S-Tastanata» sharýa qojalyǵynyń egistik alqabynda 50-ge jýyq aýyl azamaty jumys isteýde. Olardyń árqaısysyna kúndigine 3-4 myń teńgeden aqy tólenedi.
Bıyl Maqtaly aýyl okrýginde 8385 gektar egistik alqap bar. Onyń 285 gektary qarbyz, 730 gektary qaýyn, al baqshanyń jalpy kólemi 1300 gektardy quraıdy.
