Jetisaıdaǵy órt: Jańa bazar salynyp, kásipkerler shyǵyny óteledi
Órtengen bazar ornynda bolyp, Facebook jelisi arqyly tikeleı efırge shyqqan Sáken Qalqamanov qazirgi tańda júrgizilip jatqan jumystardyń barysymen tanystyrdy.
«Jetisaıdaǵy bazarda qarqyndy jumys bastaldy. Júk kólikteri jetkilikti. Qajetti tehnıka eki aýdannan jumyldyryldy. Bir-eki kúnde órt qaldyqtarynan tazartylady. Paralleldi túrdi jańa bazardyń eskızdik proektisi jasalyp jatyr. Aldaǵy ýaqytta zamanaýı jańa bazar salynady. Onda zardap shekken satýshylar jaıǵasady jáne olardan 1 jyl boıy oryndy jalǵa alý aqysy alynbaıdy», - dedi ol.
Sondaı-aq ol kásipkerlerdiń shyǵynyn ótep berý maqsatynda «Túrkistan» korporatıvtik áleýmettik damý qory ashylǵanyn jetkizdi.
«Úlken shyǵyndardy ótep berý isiniń jalǵyz joly bar. Jekemenshik múlik bolǵan soń zań boıynsha bıýdjetten qarjy qaraı almaımyz. Sondyqtan qordy jarııaladyq. Qazir sol qor arqyly qarjy jınalýda. Sondaı-aq bazardyń ıelerinen úlken somany jabýdy talap etip otyrmyz», - dedi Sáken Qalqamanov.
Qazirgi kezde oqıǵa ornynda órt qaldyqtarynan tazartý jumystary táýlik boıy júrip jatyr. Qyzyl jalynnan zaqym kelgen 900 sharshy metr jer jyldam rettelý úshin 6 sektorǵa bólindi. Ár sektorda Jetisaıǵa jaqyn ornalasqan Maqtaaral, Saryaǵash, Keles, Shardara, Jetisaı, Qazyǵurt aýdandarynan keletin qurylysshylar jumys isteıdi. Qurylys jumystary 1 aıda tolyq bitedi dep josparlanyp otyr.
Eske salaıyq, 26 tamyzda Jetisaıdaǵy «Kúlparshyn» bazarynan órt shyqty. Saldarynan 450-ge jýyq kásipkerdiń zattary tolyǵymen janyp ketti.
Keıin kásipkerler ortalyq kósheni jaýyp, bazar ákimshiliginen nysandy tezdetip ashýdy talap etti. Oqıǵa ornyna oblys ákiminiń orynbasary Sáken Qalqamanov bardy.
