Jetisaıda sýarmaly jerler kólemin arttyrý jumystary qarqyndy júrgizilýde
JETІSAI. QazAqparat – Túrkistan oblysy, Jetisaı aýdanynda sýarmaly jerler kólemin arttyrý jumystary qarqyndy júrgizilýde. Eldegi tótenshe jaǵdaıǵa baılanysty qabyldanǵan karantındik rejımge qaramastan sýarmaly jerlerdiń tıimdiligin arttyrý men aǵyn sý kólemin únemdeý baǵytynda «QazSýShar» RMK Túrkistan fılıaly tarapynan aýqymdy jobalar qolǵa alynǵan, dep habarlaıdy QazAqparat tilshisi.
«Jumyspen qamtýdyń Jol kartasy» memlekettik baǵdarlamasy aıasynda 50,741 shaqyrym kanaldardy mehanıkalyq tazalaýdan ótkizý josparlansa, uzyndyǵy 35,666 shaqyrymdy quraıtyn kanaldar tolyq tazalaýdan ótken. Búginde K-25 kanalynyń tazalanýy tıis 22,7 shaqyrymynyń 5,5 shaqyrymy óskindi shópter men shógindi tunbalardan tolyqtaı tazalanǵan. 15 myń gektarda 2400 sharýa qojalyǵy ornalasqan atalmysh kanaldyń boıynda 4 tehnıka qyzý jumys isteýde. Aǵymdaǵy jyly aryq-atyzdardy tazalaý jumystarynyń jyldaǵydan erte bastalýynyń birden-bir sebebi – elimizge jylyna 13 mlrd 540 mln tekshe metr sý jiberetin qyrǵyzstandyq «Toqtaǵul» sý qoımasynan alatyn aǵyn sý kóleminiń 2 mlrd 40 mln tekshe metrge azaıýy bolyp otyr. Búginde uzyndyǵy 3 myń shaqyrymǵa jýyq irili-usaqty 1068 kanaly bar Jetisaı aýdanynyń egistik jer kólemi 77 274,6 shaqyrymdy quraıdy. 1556,9 shaqyrymdy qamtıtyn 780 sý júıesi ornatylǵan.
Aıta keteıik, búginge deıin egistik alqapqa asa qajetti aǵyn sý aýdan boıynsha úlken másele bolyp kelgen bolatyn. Basty kedergi - kanaldar men ishki sý júıeleriniń ultandary maı topyraq pen shóp-shalańnan tazalanbaýy.
