Jetisaıda sabyn shyǵaratyn kásipker kelinshek kúnine 350 myń teńge tabys taýyp otyr

JETІSAI. QazAqparat – Túrkistan oblysy Jetisaı qalasynyń turǵyny Elmıra Jalteeva 505 myń teńge kóleminde qaıtarymsyz memlekettik grant jeńip alǵan. Іsker kelinshek búginde kir sabyn shyǵarýdy qolǵa alyp, kúnine 350 myń teńge taýyp otyr, dep habarlaıdy QazAqparat tilshisi.

Qurylǵanyna nebári bir jyl tolǵan «Elmıra» jeke kásipkerligi búginde táýligine orta eseppen - 1 tonna, ıaǵnı 5000 dana sabyn shyǵarady.

Suranys artqan kezde sabynnyń kólemi 10 myń danaǵa deıin ulǵaıady. Іsker kelinshek ár sabyndy 70-80 teńgeden saýdalap, turaqty tabysyn taýyp otyr.

Búginde ol otbasylyq kásipti 2 adam bolyp dóńgeletip keledi. Aıtýynsha, bul kásiptiń shyǵyny az. Óıtkeni shıkizat retinde qoldanylǵan tońmaı satyp alyp, qaınatady.

Kir sabyn daıyndaý úshin sol tońmaı men soda bolsa bolǵany.

Al, negizgi tutynýshylar - Jetisaı aýdanynyń turǵyndary. Ónimniń sapasy joǵary ári tabıǵı taza bolǵandyqtan alýshy da kóp.

Aldaǵy ýaqytta daıyn ónimge ózge oblystardan suranys bolsa, kásip ıesi tsehti úlkeıtý arqyly qosymsha jumys oryndaryn ashpaq.

Aıta keterligi, bıyl Jetisaı aýdanynda jańa bıznes ıdeıalardy iske asyrý maqsatynda 559 adam memlekettik grant alǵan bolatyn.

Olarǵa kásibin ashý úshin memleketten 309 mln teńge qarjy berilgen.