Jetisaıda Prezıdent Joldaýyn talqylaýǵa arnalǵan jıyn ótti

JETІSAI. QazAqparat – Túrkistan oblysy Jetisaı aýdanynda QR Prezıdenti Qasym-Jomart Toqaevtyń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» taqyrybyndaǵy alǵashqy Joldaýyn talqylaýǵa arnalǵan jıyn ótti. Basqosýǵa Túrkistan oblysy ákiminiń orynbasary Meıirjan Myrzalıev qatysyp, kásipkerlik, mádenıet, bilim salalary men muǵalim mártebesin kóterilý máselesine erekshe toqtalyp ótti, dep habarlaıdy QazAqparat tilshisi.

Aýdannyń zııaly qaýym ókilderi men turǵyndary, mekeme basshylary men kásipkerler qatysqan jıynda Meıirjan Myrzalıev árbir kúni qarbalas tirshilikke toly táýelsizdik jyldarynda qol jetkizgen jetistikterimizdi dáriptep, saqtap qalýǵa jáne ári qaraı damytýǵa shaqyrdy. Sondaı-aq, atalǵan is-shara barysynda aýdan turǵyndary men zııaly qaýym ókilderi de óz pikirin bildirdi.

«Búgingi jetistikter – ortaq eńbegimizdiń jemisi. Osy qol jetken jetistikterimizdi, elimizdegi yntymaq pen birlikti, ultaralyq turaqtylyqty saqtap, óskeleń urpaqqa tabystaý bizdiń mindetimiz. Memleket basshysynyń joldaýynda qamtylmaǵan sala, aıtylmaǵan másele joq. Sondyqtan barshańyzdy memlekettik saıasatty qoldap, joldaýda mejelengen tapsyrmalardy birigip oryndaýǵa shaqyramyn», - dedi aýdandyq qoǵamdyq keńes tóraǵasy Toıym Júnisov.

Sonymen qatar, jıyn sońynda aqparattyq-nasıhattyq top jetekshisi, oblys ákiminiń orynbasary Meıirjan Iıabaıuly jergilikti kásipkerlermen ashyq dıalog quryp, atalǵan salanyń damýynda kezdesetin qıyndyqtar men kedergilerdi joıý máselelerin sóz etti. Nesıelendirý joldary men paıyzdyq ústemeleri jaıynda oblystyq qarjy ınstıtýttary basshylarynyń jaýaptaryn tyńdady.