Jetisaıda órtenip ketken bazardyń ornynda jańa saýda nysanynyń qurylysy bastaldy
TÚRKІSTAN. QazAqparat – Jetisaıdaǵy «Kúlparshyn» bazary órt qaldyqtarynan tazartylyp, jańa nysannyń qurylys jumystary bastaldy, dep habarlaıdy QazAqparat tilshisi.
Jańa bazardyń qurylys jumystaryna 15 arnaýly tehnıka jumyldyrylǵan. Negizgi jumysty «TAYMAS» JShS men «Nur-L» JShS atqarady. Al, «MPK PROEKT» JShS sý jáne káriz júıeleriniń qurylysyn júrgizip jatyr.
Túrkistan oblysy ákiminiń birinshi orynbasary Arman Jetpisbaev órtten zardap shekken 29 jeke kásipkermen kezdesip, aryz-shaǵymdaryn qaraıtyndyǵyn jetkizdi. Bazar men tıisti mekeme basshylarynyń qatysýymen arnaıy jıyn ótkizip, sala mamandaryna naqty tapsyrmalar júktedi.
Sondaı-aq, bank jáne shaǵyn nesıe berý ortalyqtarynyń ókilderimen de kezdesý ótti. Onda órtten zardap shekken kásipkerlerdiń nesıe merzimderin ýaqytsha toqtata turý jáne tómen paıyzda kómek retinde nesıe berý máseleleri talqylandy.
Aıta keteıik, 26 tamyzda Jetisaıdaǵy «Kúlparshyn» bazarynan órt shyqty. Saldarynan 450-ge jýyq kásipkerdiń zattary tolyǵymen janyp ketti. Keltirilgen shyǵyndy óteý boıynsha arnaıy qor quryldy.
