Jetisaıda órtengen bazar 15 kún ishinde qaıta qalpyna keledi
TÚRKІSTAN. QazAqparat - Jetisaıda órtengen bazar 15 kún ishinde qalypqa keltiriledi. Qazir atalǵan jaǵdaı boıynsha saraptama jumystary júrgizilýde, dep habarlaıdy QazAqparat tilshisi.
Jetisaılyq kásipkerler búgin taǵy da ortalyq kósheni jaýyp, bazar ákimshiliginen nysandy tezdetip ashýdy talap etti.
Oqıǵa ornynda bolyp, halyqpen kezdesken oblys ákiminiń orynbasary Sáken Qalqamanov pen aýdan ákimi Murat Qadyrbek bazardaǵy jóndeý jumystary 1-2 kún ishinde bastalatynyn túsindirdi.
«Eki saraptama jasalady. Birinshisi - qurylys saraptamasy, ekinshisi – taýarlyq saraptama. Qazir bazar ıesi jańa nysannyń jobasyn jasap, bizge usynady. Órt qaýipsizdigin saqtaıtyn ári halyqqa qoljetimdi bolatyn bazar salýymyz kerek. Órtengen bazar isi boıynsha tergeý jumystary bastaldy. Nysan ıesi ýáde bergendeı, 15-20 kún ishinde bazar iske qosylady», - dedi Sáken Qalqamanov.
Jınalystan keıin aýdan ákimdiginde bazar kásipkerleriniń nesıe ýaqytyn shegerý, qaıta qarjylandyrý boıynsha ekinshi deńgeıli bank ókilderimen kezdesý ótti.
Onda Halyq bank, Jýsan bank, KMF ókilderi kelip kásipkerlerdiń árqaısymen jekeleı jumys júrgizetindigi aıtyldy.
Sondaı-aq shyǵyndy esepteý boıynsha komıssııa quramyna kásipkerler arasynan belsendi azamattar kirdi.
Taýary órtenip ketken kásipkerler tizimi jasalyp, bazardyń ár bólimi boıynsha tıisti aqparatty jınaqtaıtyn jaýaptylar bekitildi.
Aıta keteıik, keshe Jetisaıdaǵy «Kúlparshyn» bazarynan órt shyǵyp, bazardaǵy saýda qatarlarynyń tyǵyz ornalasqan jeri, matalar men kıim keshekter, turmysqa qajetti zattar satatyn aýmaǵy otqa oranǵan bolatyn.
Órt saldarynan 450-ge jýyq kásipkerdiń zattary tolyǵymen janyp ketti.
