Jetisaıda ógeı shesheden qorlyq kórgen úsh qyz beıimdeý ortalyǵyna ornalastyryldy
TÚRKІSTAN. QazAqparat - Túrkistan oblysynyń Jetisaı aýdanynda ógeı shesheden qorlyq kórgen úsh qyz Shymkenttegi kámeletke tolmaǵandardy beıimdeý ortalyǵyna ornalastyryldy. Bul týraly atalǵan ortalyq dırektorynyń orynbasary Nazgúl Qurmanalıeva málimdedi, dep habarlaıdy QazAqparat tilshisi.
Kámeletke tolmaǵan úsh jasóspirim 20 sáýirde aýdandyq aýrýhanadan shyǵarylǵan. Sóıtip Jetisaı aýdanynda qurylǵan arnaıy komıssııa úsh qyzdy beıimdeý ortalyǵyna aýystyrý týraly sheshim qabyldaǵan. Nazgúl Qurmanalıevanyń sózinshe, olar ortalyqqa senbi kúni tús kezinde jetkizilgen.
«Qazir úsheýiniń de jeke áleýmettik jaǵdaıy barlyǵy birqalypty, jaqsy. Ortalyqqa beıimdelýleri birqalypty. Oqý-tárbıelik, psıhologııalyq-áleýmettik kómekterdiń barlyǵy kórsetilýde. Tamaqqa degen tábetteri de ashyla bastady. Basqa balalarmen jáne ortalyq qyzmetkerlerimen qarym-qatynasy jaqsy», - deıdi Nazgúl Qurmanalıeva.
Shymkentke sondaı-aq, úsh qyzǵa qorlyq kórsetken dep aıyptalǵan ógeı shesheniń 1 jas 7 aılyq sábıi de jetkizildi. Náreste qazir qaladaǵy «Mamandandyrylǵan bóbekter úıine» ornalastyrylǵan. Al, 30 aptalyq júktiligi bar kúdikti áıel sottyń sheshimimen úı qamaqta otyr. Tergeý sharalary aıaqtalǵansha kámeletke tomaǵandar mamandardyń baqylaýynda bolyp, psıhologııalyq kómek kórsetilmek.
Eske salaıyq, Jetisaı qalasynda ógeı sheshe qyzdaryna ıne tyǵyp, tońazytqyshqa otyrǵyzyp azaptaǵany jaıly belgili bolǵan edi. Keıinnen osy oqıǵaǵa baılanysty qylmystyq is qozǵalyp, áıel úı qamaqqa alyndy.
Aıta keteıik, qyzdardyń denesinen soqqy izin kórgen muǵalimder polıtsııaǵa habar bergen. Jasóspirimderdiń úsheýi de aýdandyq aýrýhanaǵa jatqyzylyp, olarǵa tıisti emdik sharalary kórsetilgen bolatyn.
