Jetisaıda ógeı shesheden qorlyq kórgen qyzdar aýrýhanaǵa jatqyzyldy
TÚRKІSTAN. QazAqparat - Túrkistan oblysy, Jetisaı aýdanynda ógeı shesheden qorlyq kórgen qyzdar aýrýhanaǵa jatqyzylyp, em qabyldaýda. Bul týraly óńirlik densaýlyq saqtaý basqarmasynyń baspasóz hatshysy Mıra Súleımenova aıtty, dep habarlaıdy QazAqparat tilshisi.
Mıra Súleımenovanyń sózinshe, úsh qyzdyń da jaǵdaıyn dárigerler qalypty dep baǵalaýda.
«Olarǵa aýrýhanaǵa túsken kúnnen jan - jaqty medıtsınalyq kómek kórsetilýde. Ómiri men densaýlyǵyna qatysty esh qaýip joq. Ógeı shesheden zábir kórgen kámelet jasqa tolmaǵan qyzdarmen bilikti mamandar, psıhologtar jumys istep jatyr»,- deıdi basqarmanyń baspasóz hatshysy.
Buǵan deıin Jetisaı aýdanynda ógeı sheshe qyzdaryna qorlyq kórsetken beınejazba taraǵanyn habarlaǵan edik.
Osydan keıin Túrkistan oblystyq Polıtsııa departamenti atalǵan oqıǵaǵa qatysty tergeý sharalary bastalǵanyn málimdedi.
Іshki ister mınıstri Erlan Turǵymbaev ta bul máseleni óz baqylaýyna alǵany belgili boldy.
