Jetisaıda qyzdaryna qorlyq kórsetip kelgen ógeı sheshege qatysty tergeý bastaldy
TÚRKІSTAN. QazAqparat - Túrkistan oblysy, Jetisaı aýdanynda qyzdaryna qorlyq kórsetip kelgen ógeı sheshege qatysty tergeý sharalary bastaldy. Bul týraly oblystyq Polıtsııa departamenti resmı málimet taratty, dep habarlaıdy QazAqparat tilshisi.
«Quzyrly organdar Jetisaı aýdanynda bolǵan jáne áleýmettik jeli arqyly taraǵan ógeı ananyń qatygezdikpen balalaryn uryp-soǵyp, dene jaraqattaryn salý áreketin anyqtady. Bul jaıt Jetisaı aýdandyq polıtsııa basqarmasynda tirkeldi. QR QK 140-babyna sáıkes sotqa deıingi tergeý amaldary júrip jatyr. Kúdiktige shekteý sharasy qoldanylady. Komıssııa sheshimimen balalar ájesine tapsyrylǵan. Bul jaıt Qazaqstan Respýblıkasy Іshki ister mınıstriniń jáne oblys prokýrorynyń baqylaýynda»,- delingen habarlamada. 
Eske salaıyq, óńirdegi áleýmettik jeli belsendisi Áset Ássandı óziniń feısbýk áleýmettik jelisindegi paraqshasynda Jetisaı aýdanynda turatyn ógeı shesheniń qyzdaryna qorlyq kórsetkeni týraly beınejazba taratqan bolatyn.
Onda kelinshektiń úsh jetkishek qyzǵa ıne tyǵyp, tońazytqyshqa otyrǵyzyp qoıǵany jáne qaıshymen denelerine jaraqat salǵany aıtylady.
QazAqparat osyǵan deıin Іshki ister mınıstrligi bul oqıǵaǵa baılanysty qylmystyq is qozǵaǵandyǵyn habarlaǵan edi.
